چہ شادی کَور ءَدیم بدوک ءِ علاقہ کَیت ادا کوسٹ گارڈ ءِ مزنیں کیمپے بدوک ءِچیک پوسٹ ءِ نام ءَ زانگ بیت ادا ھمک روک ءُ آؤکیں گاڑی ءَ چہ جست کنگ ءُ آھانی دارگ ءِ ھاتر ءَ سادے ھم بندک اِنت۔۔۔اے مرداں مارا داشت ءُ جست ئے گِپت بزاں وتی قومی پرزئے پورو کُت ءُ وتی نان ئے ھِلار کُت۔۔۔ما چہ اداں وت ءَ چَڈّات ءُ دیم ءَ روان بیتیں نی ما وتی سفر ءِ گیشتریں بھر بُرّ اِتگ ات۔
مئے راستی وار ءَ تیاب اَت ءُ چپّی وار ءَ گِستاہ کوھے درا اَت۔۔۔ھمےراہ ءَ ٹُکّرے زمین ءَ روگ ءَ پد واجہ بھرام ءَ گاڑی ءِ واگ پہ زِرباری ترّینت اَنت کہ لِنک روڈے ھمے نیمگ ءَ جھلاد اَت, اے راہ تِچک ءَ پہ کلمت ءَ روان اَت مئے کِساس درستانی اولی رند اَت کہ ما اے راہ ءَ روگ ءَ اتیں۔۔۔بھرام ءَ گوشت کہ من ءُ ڈاکٹر ناگمان دیریں یکبرے چہ کراچی ءَ آیگ ءَ بیتگیں گڈا ما ھمے راہ گپتگ کہ رویں ھمّل ءِ نامانی کلمتءَ چاریں آ وھد ءَ مئے اولاک کسانیں گاڑی یے بیتگ ءُراہ ھم سکّ پرشت ءُ پروش بیتگ پمیشکہ ما سکّ جنجال بیتگیں مگرب ءِ وھد ءَ ھِیلّتے ما کلمت ءَ سر بیتگیں چہ دُکّان ءَ آپے زُرتگ ءُ پدا واتّر اِتگیں بزاں کلمت پہ شرّی نہ دیستگ۔۔ بلے مرچی مئے ارادگ اَت کلمت ءَ پہ شرّی ءُ الکاپی ءَ بہ گِندیں اود ءَ جوانیں رنگے ءَ ترّ ءُ تاب بہ کنیں گوں زید ءُ ندارگاں ھور اود ءِ مردماں گوں گِند ءُ گِدار بکنیں۔
بھرام چوناھا یک ھسابے ءَ اود ءَ سیاسی ترّ ءُ تاب ءَ روگ ءَ اَت کہ آئیءَ گوادر لسبیلہ ءِ ایم این اے واجہ اسلم بھوتانی ءِ اوٹر ءُ مھلوک چارگی اَت اَنت آھانی جنجال ءُ مشکل معلوم کنگی ات اَنت۔ اسلم بھوتانی کہ اے وھد ءَ مئے گوادر ءُ لسبیلہ ءِ یکجاھیں نمائندہ اِنت بزاں چہ ھمے حلقہ ءَ گچین بیتگیں قومی اسمبلی ءِ ممبر اِنت.
اے مرد اولی برءَ 2018 ءَ پہ ھمے سیٹ ءَ الیکشن ءَ اوشت ایت گڈا اشی ءِ نزیک تر ءُ پجاہ آروکیں مردم بھرام بلوچ بیت کہ اے حلقہ ءُ دمگ ءَ گوں اے مرد ءَ ھمراہ داری کنت, مھلوک ھم چہ اسلم بھوتانی نا آشنا بیت پدا مئے دمگاں سرکاری ھمایت ءِ مردم گوں جام کمال ءَ ھمراہ بنت ءُ عوام گیشتر بی این پی مینگل ءِ صوبائی امیدوار میر ھمل کلمتی ءِ گُشگ ءِ قومی اسمبلی ءِ اوٹ ءَ گوں سردار اختر مینگل ءَ ھراب کن اَنت بھوتانی چوش کہ آزاد امیدوارے بیت چہ مئے ڈسٹرکٹ ءَ سکّ کم اوٹ گپت البتہ نیشنل پارٹی آئیءِ سپورٹ ءَ کنت بلے آ چہ لسبیلہ ءَ باز اوٹ گپت پمیشکہ جام کمال ءُ اخترمینگل ھردوکاں کَٹّ ایت ءُ اسمبلی ءَ روت بلے اے مرد چہ وتی ھما مردماں بے ترْانگ نہ بیت کہ آئی ءَ اوٹ دئے انت مرچی ھم بھرام پمیشکہ کلمت ءَ روگ ات کہ اودا آپ ءِ نوکیں اسکیمے بِندات بیتگ بھوتانی ءِ واھگ ھمیش اِنت کہ آ مردماں منی سرا بھیسہ کتگ ءُ من ءَ وتی اوٹ داتگ آ چرے اسکیم ءَ پَشت مہ کپ انت ءُ بے بھر مہ بنت بزاں چوش مہ بیت دگہ مھلوک ءَ آپ سر بہ بیت ءُ منی مردم منی آس ءَ بہ سُچ انت۔
چوناہ ءَ گوادر ءِ گیشتریں مھلوک ءَ رند ءَ ھمے سما ھم کپتگ کہ بھوتانی سکّیں ھرابیں مردمے نہ اِنت کارے کہ آئی ءِ دستءَ بیت گڈا الّم پہ وتی مھلوک ءَ کار کنت مامُپت ءَ اے مرد ءَ اوٹ نہ داتگ۔۔۔بلے بلوچ گوش ایت ” رَندی ھِٹّ اڑے کار نہ دنت”۔ البت اسلم بھوتانی قوم پرستے گوشگ نہ بیت کہ چہ قومی بازیں جنجال ءُ جیڑھاں نادلگوش اِنت بلے عوامی ءُ علاقھی کاراں پہ جوانی ءَ کنت۔
ھیر ما چہ کلمت ءِ لِنک روڈ ءَ کِبلھی دست ءَ ایر کپت ءُ ریکانی تہ ءَ کسانیں میتگے ءَ شُتیں اے میتگ ءِ نام "ھوم ءِ ریک” اَت اے میتگ ءِ راہ ھاکی ئیں راھے ات دگہ روڈ نیست اَت بلے میتگ چہ لِنک روڈ ءَ باز دیر نہ اَت "ھوم” چوناھا کاھے کہ اے زمین ءَ باز رُستگ پمیشکہ اے جاگہ ءِ نام "ھوم ءِ ریک” ءَ نام کپتگ۔۔۔۔ اے سکّیں کسانیں میتگے اَت کہ ادا کِساس پانزدہ ءُ بیست لوگ بنت.
اے میتگ ءِ سرکماش سبزل نامیں مردے اَت کہ ما تِچک ءَ ھمے مرد ءِ لوگ ءَ شُتیں اے مرد چہ پیسر ءَ مئے ودار کنگ ءَ اَت, سبزل ءَ مارا آپ ءُ چاہ کُت بلوچی ھساب ءَ مھمان داشت سبزل ءِ میتگ ءَ بزّگی ءُ گریبی ءِ چیدگ چو کوہ ءَ رُستگ ءُپدّرا اَت اَنت۔۔۔۔سبزل ءِ وتی زند گوں پوریاگِری ءُ بزّگی ءَ گوستگ بلے ھمے بے آسراتی ئیں میتگ ءَ کہ ادا اسکول مرچی ھم بے ماشٹریں پرائمری یے کہ بس اسکول ءِ بلڈنگ اِنت ءُ ماشٹر نہ گواہ ایت سبزل ءَ وتی چُکّ وانینتگ بلکہ باندا سرکاری ءِ کارے ءِ سرا نوکر بہ بیت ءُ منی بار ءِ سُبک تر بہ کنت بلے آئی چُک بے روزگار اِنت ءُ آئی ءَ نوکری نہ رس ایت ۔۔۔۔میتگ ءَ یک زمانگے چہ کلمت ءِ واپڈا ءَ بجلی ھم اتکگ بلے مرچاں تار سِست ءُ سید بیتگ انت واپڈا ھم پیسری ھالت ءَ پَشت نہ کپتگ۔۔۔۔ بجلی ھم نیست, آپ زمانگاں مردماں چہ چات ءَ وارتگ بلے مرچاں ڈُکّال ءُ نہ گوارانی ءِ سبب ءَ چات ھم سور ترّ اِتگ انت۔ نی سبزل گوں وتی ھوم ءِ ریک ءِ نشتگیں مردماں چہ ٹینکراں آپ پہ بھا زیر ایت ءُ وارت۔۔۔اے میتگ ءَ ھسپتال ءِ نام ءُ نشان نہ گواہ ایت البت آپ ءِ نوکیں اسکیم کہ آیگ اِنت اےمردمانی میتگ ءَ ھم آپ ءِ آیگ ءِ امکان ھست۔
بگندے چہ آپ ءِ آیگ ءَ پد اے مردمانی جنجالے کم بہ ترّ ایت ءُ کوپگے سُبَک تر بہ بیت۔۔۔۔ بھرام دلمانگ اَت کہ پہ نوکیں اسکیم ءَ پیپانی پُوٹ ءُ ماپ ءَ بہ گِپت۔۔۔۔ما واجہ سبزل ءِ لوگ ءَ نِشتیں بھرام ءُ سبزل ءَ پیپ پوٹ ءُ ماپ کُت انت ءُ وتی کار ئے گیشینت اَنت ۔۔۔۔سُبارگ ءِ ھم مارا سبزل ءَ سلاہ جت بلے مارا سُبارگ ءَ ادا جلّگ ءِ ارادگ نیست اَت کہ کلمت ءِ مزنیں میتگ "گُرّ ءِ سُنٹ” ءَ بھرام ءَ لیاقت نامیں مردمے فون جتگ اَت ما سبزل ھم وتی ھمرائی ءَ زُرتءُ ھما میتگ ءِ ھاتر ءَ راہ کپتیں۔
(روان اِنت)
One Comment