کیچ کئور ءُ نہنگ کئور ھور بنت

دل پہ کیچ کئور ءِ گندگ ءٙ بند اٙت۔ واھگ کلمانٹ تاں کہ کد باریں کیچ کئور ءٙ بِگنداں۔ یک روچے من توکل کُت پہ کیچ کئور ءِ چارگ ءٙ درکپتاں۔ بس ھمے نیت کُت کیچ کئور آپ کاریت شر نیاریت نوں بس من واتر نباں۔کیچ کئور ءِ لمب ءٙ مچکدگ ئے ھست اٙت۔ مچکدگ ءٙ ھامین ات بلے تمپ ءِ نِھنگ کئور ءِ لمب ءِ مچکدگ ءِ ھامین ءٙ چے یک جتائیں رنگے ءٙ اٙت ایشی ناہ گیشتر پون تاں کوھک تاں چٙل تاں۔ من دھکان ءٙ را جست کت کہ ھامین چیا چوش انت گوشت ئے ھور باز بوتگ چہ نمب ءِ سوب ءٙ ھامین ھراب بوتگ۔ من گوشت ھور تمپ ءِ ھم مچکدگ ءٙٙ بوتگ گڑا اود ءِ ھامین ھراب چیا نہ بوتگ ؟ من ءٙ گوشت ئے تو تمپ ءِ مچکدگ دیستگ تو زاناں ھمد ءِ مردمے ءِ من گشت ھو من درامدے ناہاں۔ من گوشت تو زاناں کُج ءِ نندوکے ءِ ؟ گوشت ئے من دشت ءِ نندوکے اں۔ گڑا پہ بژن پسوئے دات گوشت ئے مچ شر گُنش کنئگ نہ بوتگاں ھامین پمشکہ ھراب بوتگ۔ من ءٙ گوشت ءِ من میراث واھمندئے اں کیچ کئور ءُ نہنگ کئور ءِ آپ ھور بیت دشت ءٙ رچیت منی دو چک دشت ءِ میراث ءِ پانگ انت من اے مچکدگ ءِ ھامین چارگ ءٙ اتکگ اوں۔ من دہکان ءٙ را گُشت کیچ کئور ءُ نہنگ کئور کہ ھور بنت آپ دشت ءٙ رچیت گڑا دشت شر آباد بیت گوشت ئے جی ھو۔ من پدا چہ مچکدگ ءِ لمب ءٙ چے کئور ءِ تہا اِیر کپتاں کئور سک پراہ ءُ دراج اٙت۔ درچک ھم باز رُستگ اٙت بلے گِیشتریں درچک ببُر تاں ھر کجا کہ من گوں ببُراں مانگیشتاں گُڑا ببُراں منی گُد چاک چاک کتاں اے درچک ایوکیں کُنٹگ ءُ ڈنگر اتنت پدا من ءٙ ماھے بوتگ اٙت کہ من وتی گُد مٹ نہ کتگ تاں۔ کئور ءِ دلبند ءٙٙ پاد منی ایر تاں من ءٙ ڈونڈئے ءِ بو بوت۔ کُچکانی وکگ ءِ سک توار اٙت چریشی ءٙ منی جان ءِ پُٹ پاد اتکاں کہ گوردگیں کُچکے منی جند ءٙ مہ وارت۔
یک روچے ناکو واژداد من ءٙ گُشتگ اٙت منی پسے گار اِنت۔ وھدے من ءٙ کئور ءِ توک ءٙ ڈُونڈئے بو بوت ءُ کُچکانی وکگ ءِ توار منی گُشاں کپت۔ گڑا منی ھیال تچک ءٙ پہ ناکو ءِ پس ءٙ شُت من وتی زھیر واریں دل ءٙ جِیڑ اِت چو بیت اے ناکو واژداد ءِ پس اِنت گوردگیں کُچکاں وارتگ۔ ناکو واژداد ءٙ من ءٙ وتی پس ءِ ٹِک ءُ نشان داتگ تاں۔ منا گُشتگ اٙت ئے منی پس مٙلّیں ءُ کپتریں گِتاچے۔ من درچکے ءِ تھا زُنپُترت اوں کہ کُچکے من ءٙ مگندیت ءُ مہ وارت تاں چم منی جنِکی سُھریں پشکے ءٙ کپت گوں ڈنگراں اڈیتگ اٙت۔ من ءٙ یکدم مُلوک ءِ یاد اتک من مُلوک ءٙ مُلوک ءِ جٙن ءِ شپ ءٙ دیستگ اٙت ملوک بانورءٙ اٙت ملوک سک گل اٙت ملُوک ءٙ انچیں سُھریں پشکے گورا اٙت۔ من ملوک ءِ جٙنّ ءِ شپ ءٙ ملوک ءِ لوگ ءٙ جل اِت کہ سُھب بیت سالونک ءٙ مُرادبادی دیاں۔ سُھب بوت بلے سالونک لوگ ءٙ نہ یتک۔ منی ارس رتکاں من ءٙ پہ مُلوک سک درد بوت انچو گُش ءِ زیمیں دل ءٙ کارچے لگِت ءُ گُونڈلیں تیرے ءٙ دل سُبت۔
بلے نھنگ کئور ءِ درچک کیچ کئور ءِ درچکاں چے دگہ ھم رنگے ءٙ تاں گز سک بز تاں ساھگ ءِ ھم بز تاں۔ یک رندے من تُمپ ءِ ھلک ءِ پُشت ءٙ نھنگ کئور ءِ لمب ءٙ نشتگ تاں نھنگ کئورا آپ اٙورتگ اٙت۔ سے جِنک کئور ءِ لمب ءٙ نشتگ اٙت یک جِنکے چہ دوئیں جِنکاں کمے گِست اٙت کئور ءِ آپ ءٙ چپیں دست ءِ سرا سِنگ جنئگ ءٙ اٙت۔ بلے مردینی گُدے گورا اٙت۔ گوں شیرکنیں بچکندے ءٙ من ءٙ گُوشت ئے لہ لہ من کئور ءِ توک ءٙ رواں آپ ءِ تہا ساھدارے بُڈ ورگ ءٙ اِنت اگاں من مہ رواں ساھدار بُکیت نہ رکھیت۔ من گُشت تو روئے زاناں تو نہ بُڈّ ءِ ترا آپ نہ بارت من ءٙ گوشت ئے ناں من نبُڑاں من ءٙ آپ ھم نبارت چیئکہ من اوژنا زاناں۔ آ دوئیں جِنکانی دیم گِپتگ اٙت آدینکے دست ءٙ ات ءِ تمپ ءِ ھلک ءٙ لِیٹ جنئگ ءٙ اتاں بلے انچیں کرودے ءِ لمب ءٙ اُشتاتگ تاں کرود ءٙ را آپ ءٙ چیرءٙ سک بُر اِتگ اٙت من گُشت وتی جاگہ ءٙ مٹ کن اِت کرود لُمبیت شُمئے جند کپیت ءُ پرُشیت آدینک اوں پرُشیت۔ من ءٙ گُوشت ئے تو راست گُش ءِ یکے ءِ دست وتی پندول ءٙ اٙت من گُشت بلکیں من ءٙ ٹیکی ئے سوگات کنت انچو وتی دستے چہ پندول ءٙ کش اِت لنکُکے وتی دیم ءِ مچکدگ ءٙ ٹال کُت لنکُک ءٙ نشانے ھم پِر اٙت من ءٙ گوشت ئے مچکدگ ءٙ ھامین اِنت۔ اے مچکدگے تہا یک مچے ھست سک بُرز اِنت اِیشی ناہ ءِ تام وش ءُ شیرکن انت بلے چہ بُرزی ءٙ کس اے مچ ءِ سرا شُت نکنت تو بُرو ھمیشی سرا ناہاں بچن کپات ءٙ بکن۔ من گُشت اے مچ سک بُرز اِنت اِیشی سرا ابید تورءٙ روگ نہ بیت گوشت ئے مئے لوگ ءٙ تورے ھست گڑا ھمے تورے سرا برو۔