آزمانک: مُرتگیں دیم!

آزمانکار: یاسوناری کاواباتا

بلوچی رجانکار: جے ایم آزات

بیا ات ایشرا بچار ات کہ چونیں جاورانی تہ ءَ انت،، اڑئے آ چنچو ھدوک ات پہ تئی یک دگہ دیدارے ءَ، ،،آ مرد ءِ ترو ءَ آرا زوت زوت ءَ کوٹی ءِ تہ ءَ بران ءَ گشت،، ھما مردم کہ آئی زال ءِ تھت ءِ کر ءُ کشاں نشتگ ات انت، آ سجئیناں پجیگ ءَ چَک آئی نیمگ ءَ ترینت،، ۔۔
،،ایشرا کمو بچار ات! ،، آئی ءِ ترو ءَ چہ آئی ءِ زال ءِ دیم ءَ چادر لیٹینان ءَ یک برے پدا گشت۔
انچو آئی ءَ دل نہ داشت ءُ اچست ءَ گشگ بندات کت۔،،کلھے بوشت! من ایشی ءَ ایوک ءَ چارت کناں؟ شما من ءَ گوں منی زال ءِ ھمرائی ءَ اے کوٹی ءَ دمانے ایوکی ءَ کِل ات؟،،
چہ ایشی ءِ گپاں ایشی زال ءِ کھول ءِ مردمانی دل ءَ پہ ایشی ءَ نیکیں واھگ ودی بوت، آ سرجم ءَ مدان مدان ءَ دراتک انت ءُ تھتگ اش بست۔آ مرد ءَ اسپیتیں گُد چست کت۔
آئی زال ءِ دیم چہ مَرگ ءِ بیمناکیں درشان ءَ ڈڈرتگ ات۔آئی گُب تہ ءَ شتگ ات انت ءُ آئی دنتان چہ لونساں سربر اتکگ ات انت، ءُ آئی چمانی کونس ھشک تر اتگ انت ءُ چمّانی تہ ءَ لچتگ ات انت۔۔یک پدریں تکانسری یے ءَ بے تاھیری یے آئی ءِ پیشانیگ ءِ سرءَ بادینتگ ات۔
آ لھتیں دمان ءَ نشت ءُ وتی زال ءِ نز اتکگیں دیم ئِے چار ات ۔
پدا آئی ءَ وتی دست زال ءِ لنٹانی سرا ایر کت انت ءُ آئی دپ ءِ بند کنگ ءِ جھد کت۔آئی زور جت ءُ زال ءِ دپ بند کت۔بلے انچو کہ آئی ءَ دست دور کت انچو دپ پچ بوت ءُ لنٹ لونجان بوت انت۔آئی ءَ زال ءِ دپ پدا بند کت بلے پدا پچ بوت۔آئی یکوئی ھمے وڑ کت۔ھمنچو بوت کہ آئی زال ءِ دپ ءِ کر ءُ کشانی کرچک کلھے کمتر بوت انت۔ ھمنچک ءَ آئی وتی لنککانی بوگانی سرا گیش بوھوکیں لرزگے مار ات۔آئی وتی پیشانی ءَ را ترند ءَ لگاشت کہ پیشانی ءِ مجتگیں سان ءَ چیر دات بکنت۔ آئی لنکک بن گپت انت۔
آ پدا بے ترک ءُ توار ءَ نشت ءُ نوکیں دیم ءِ چارگ ءِ بنا کت۔
آئی ترو ءُ دسکیچ کوٹی ءَ پترت انت۔ ،، تو بلکیں چہ ریل ءِ مساپت ءَ شند ءُ پندئے چیزے بچن بور ءُ کمو آرام بکن……… اوہ،، مات ءِ چماں ارس ءِ گوارگ بندات کت۔
،،انسان ءِ روح ھم ترسناکیں چیزے۔ آ تاں ھما وھد ءَ سرجم ءَ نہ مرتگ ات تاں تو واتر نیاتکگ ات ئے ۔اے اجبیں گپے۔تو ایوک ءَ آئی نیمگ ءَ بس چک جت ءُ آئی دیم سرجم ءَ تاھیر گپت……. اے وَ شر بوت، نوں ھرچیز شر انت۔،،
آئی زال ءِ کستریں گھار ءَ کہ آئی چم یک شرکنیں وشی یے ءِ سوب ءَ جلواناک ات انت، آئی مرد ءِ چمانی تہ ءَ سرُک کت کہ آئی چمانی تہ ءَ دیوانگی پدّر ات، گڑا آ ھم پوھانک جنگ ءُ گریوگ ءَ لگ ات۔۔۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Close
Close