کلمت ءِ گُّر ءِ سُنٹ ءِ بازار ءَ ما لیاقت نامیں مردے ءِ لوگ ءَ شُتیں اے واجہ ءَ گوں بھرام ءَپیسر ءَ رابطہ کُتگ اَت, لیاقت چہ پیسر ءَ مئے ودار ءَ اَت گوں مئے سر بوگ ءَ آئی ءَ مارا وشّ آتک ءُ بیا پہ ھَیر کُت مارا وتی بلوچی بیٹک بزان مھمانجاہ ءَ نادینت چاہ ءُ آپ ئے کُت۔
لیاقت ءِ میتگ "گُرّ ءِ سُنٹ” ءِ مردم گیشتر وت ماں وت ءَ سیاد ءُ وارث اَنت بزاں یکّیں ٹکّ ءُ قبیلہ ءِ مردم اَنت کہ اِشاں "سَنگُر” گوش اَنت ۔۔۔۔کلمت ءَ چوناھا دو ٹَکّ ءِ مردم نندوک اَنت ۔۔۔”جونژ” ءُ "چَنڈی” کھدا پِنڈوک ءِ میتگ ءِ مردم کلمتی اَنت کہ آ وت ءَ "میر” گوش اَنت ءُ اینگہ گیشتریں مھلوک "سَنگُر” اَنت ۔۔۔۔۔کلمتی نماز وان اَنت ءُ سنگُر زِگر کن اَنت بلے اشانی تہ ءَ مزھبی دوری ءُ شِدّت ھِچ پیمیں نیست بزاں مردم مزھبی ھساب ءَ وت ءَ یک دومی ءَ بالا تر نہ لیک اَنت۔
ما لیاقت ءِ لوگ ءَ نِشت چاہ واری کُت لیاقت چوناھا چہ کلمت ءِ سوشل ءُ ایکٹیو تریں چاگردی مردماں یکّے وانندگ ءُ زانتکار اِنت وتی دمگ ءِ دیم ءَ دراتکگ ءُ زاھریں مردمے کہ اد ءِ گیشتریں سیاسی چِست ءُ ایر ھمے مرد ءِ دست ءَ اَنت۔
کلمت کہ ڈسٹرکٹ گوادر ءِ تہ ءَ سرکاری ریکارڈانی رِد ءَ جِتائیں یونین کونسلے لیاقت ھمے یونین کونسل ءِ سیکریٹری اِنت پدا وت شرّیں مھماندار ءُ میار جَلّیں بلوچے پمیشکہ گوں مئے کلمت ءِ رسگ ءَ سکّ وش ءُ گَل اَت, لیاقت ءِ میتگ "گُرّ ءِ سُنٹ” ءِ لوگانی دپی نیمگ ءَ بزاں زِرباری نیمگ ءَ کلمت ءِ تیاب اَت ءُ رودراتکی نیمگ ءَ مزنیں "ھور” اِنت۔
کلمت ءِ گیشتریں لوگ کہ ھمدا تیاب ءِ دپ ءَ اَنت ادا زمین ءِ ریک وشّ ءُ ڈالیں ریکے گوں گوات ءِ مانپَچ ءَ چِست نہ بیت بزاں ریک ءِ دنز نہ کنت۔۔۔۔اد ءَ زِرگوات ءُ کَوش انچوش لیلار ایت کہ مردم ءَ آگھی ءَ واب گیج ایت, میتگ ءِ مردم ھم سکّیں مھروان ءُ مردم دوستیں مردم اَنت۔ لیاقت وتی بلوچی اوتاگ ءَ کہ کسانیں کمرھے اَت آئی ءِ چھت گوں دار ءُ تھتگاں ساھیل کُتگ ات گوں ما نِشتگ ءُ کِسّہ کنگ ءَ اَت وتی گوستگیں وشّیں باریگ ءُ زمانگ ءَ گیرآرگ ءَ اَت۔ آئی ءَ گوں ما ھم ھمے گوشت کہ مئے مُلک کلمت بے مَٹّیں مُلکے بیتگ ادا ما درست وت ماں وت برْات ءُ تپاکیں زند ءِ گوازینگیں بلے ھَیپ کہ زمانگ ءِ پجّی ءَ مارا ھم ھار برگ ءَ اِنت۔ یکّ نیمگے ءَ پاکستان ءِ زِری لَشکر نیوی ءَ مان بستگ کہ مئے زمیناں بہ بارت ءُ دومی نیمگ ءَ نِشہ ءِ سِل جَتیں نادراھی مئے ورناھاں تَھ جَت کنگ ءُ ورگ ءَ اِنت۔
کلمت ءِ پاسمندگیں اے دمگ ءِ میتگ میتگ ءَ گوں تریاک ءَ ھور نوک اتکگیں نِشہ شیشیہ ءُ کریش ھم چو پَپُک ءِ پیم ءَ بہا بیت کہ اد ءِ ورناھانی تباھی ءُ بربادی ءِ مستریں سوباں یکّے ھمے شومیں نِشہ اِنت بے روزگاری ءُ بے کاری ءِ تیلانک گیشتر نوگُلیں ورناھاں گوں نِشہ ءَ میڑینگ ءَ اِنت۔ دومی نیمگ ءَ پاکستان ءِ سلاہ بندیں ادارھاں مرچاں پہ زمین ءَ ھنچش ھڑّکہ کشّ اِتگ کہ آ گوش اَنت جاھے ٹِکّے زمین پشت کپتگ ھم مئیگ بہ بیت۔
کلمت ءِ وش زیدیں زمین ءَ بِلّ کہ اے زید ءَ ھرکسے کہ گِند ایت دل ءَ ھمے گوش ایت دریگتیں منی بہ بیتیں, لھتیں سال بیت کہ نیوی ءَ چو پاکستان ءِ تیاب دپی دگہ دمگاں کہ آئی ءَ چہ پیسرا بازیں زمینے قبضہ کُتگ دلمانگ اِنت کلمت ءِ زمین ءَ ھم بہ بارت, کلمت ءِ ھور ءُ زمین کھتونی ءُ کاگدانی تہا دیر اِنت کہ اد ءِ جھمنندیں مردماں وتی نام ءَ کُتگ انت بلے اے زوراک کُج ءَ کاگد ءُ کھتونی منّ اَنت اشاں ھرچے دست ءَ کپ ایت شاپ انت ئے۔
لیاقت ھم چہ وتی دگہ درد ءُ بے آسراتیاں گیش ھمے درد ءَ نالگ ءَ اَت کہ ما چرے مُلک ءَ دگہ ھِچّ نہ لوٹیں بس مئے زمین ءِ ٹِکّ ءَ مہ بارت کہ ما اد ءَ نشتگ ءُ زند گوازینگ ءَ اِنت, لیاقت ءِ گُشگ ءِ پدا کلمت ءِ مھلوک وتی زمینانی پھازگ ءَ وت ماں وت تِپاک ءُ یکجاہ اَنت بلے آھاں سیاسی ھساب ءَ پُشت ءُ پارَت نیست پرے گپّ ءَ آ سکّ بژنیگ اَنت کہ ما اینکس وھد اِنت سیاسی پارٹیانی رند ءَ گون اِنت آھاں اوٹ کنگ اِنت بلے اے سکّیانی وھد ءَ انّوں آھاں کسے پہ دلجمی گون نہ اِنت۔ بازیں سیاسی سروکاں آھانی ھمرائی ءِ جار جتگ ءُ گوشتگ اِش ما شُمے پُشت ءَ گون اِنت ءُ دگہ لھتین ءَ تُرسینتگ انت کہ شما گِھتر ھمیش اِنت گوں ارزانیں نِھادے ءَ وتی زمیناں نیوی ءِ کِرّا بھا بہ کن اِت اگاں ناں نیوی شمے زمیناں ھم بارت ءُ انّوں کہ ھمے زرّ شمارا رسگ ءَ اَنت پدا اے ھم شمارا نہ رس انت۔۔۔۔۔نیوی ءَ کلمت ءِ لوگانی کَش ءَ وتی نِشان جتگ ءُ کَش ءُ کِرّی گیشترین زمین وتی دست ءَ آرتگ انت پمیشکہ کلمت ءِ جھمنندیں مردماں اے سھت ءَ وتی دگہ درستیں بے آسراتی، جنجال ءُ گم ءُ گَڑتی بیھال کُتگ انت ءُ ھمے تُرس ءَ دلاپ اَنت کہ آھانی زمین برگ مہ بیت.
چوناھا کلمت ءِ مردمانی میار نہ اِنت اِشاں کہ وتی دپ جاہ ئے سَکّ کُتگ گڈا نزور ءِ مال ءَ ” مَلو” ءِ مال سرہد بیتگ اَنت ءُ ارجان اِش جَتگ۔ کلمت ءِ کِسّہ ءَ بِلّ کہ اد ءِ ناوانندگیں مھلوک مرچی بیست ءُ یکمی کرن ءَ ھم وتی ھکّانی پچگرگ ءِ قانونی راہ ءُ رھبنداں نابلد اِنت۔ بے سروکی ءُ بے لیڈری ءَ مھلوک گیشتر نابود ءُ پُژمُردو کُتگ۔ کلمت ءِ مھلونک مرچی ھم پنچسد سال پیسری شانزھمی کرن ءِ کلمت ءَ جھمنندیں میر ھمّل کلمتی ءَ گیرارگ اِنت کہ آئی ءَ بلوچ ءِ سرجمیں زِر ءُ تیاب چہ دری زوراکانی دست ءَ پھاز اِتگ بلے بژن مرچی آئی ءِ جِند ءِ ھنکین ، نِشان ءُ ٹِکّ ءَ رکّینوکے در نہ کپ ایت۔۔۔مرچی ھم ھما ھمّل ءِ ھم نامیں میر ھمّل کلمتی اد ءِ مھلوک ءِ سروگانی ءَ کنگ اِنت, کلمت ءِ مِنندیگ چہ گوادر ءِ انّوگیں ایم پی اے میر ھمّل کلمتی ءَ ھمے امیتوار اِنت کہ آ وتی لِچّ اِتگیں نام ئے ھَکّ ءَ الّم ادا کنت ءُ مئے زمین ءَ پہ برگ ءَ نئیل ایت۔
(روان اِنت)
One Comment