ہاسٹل ءٙ ھر یکے ءِ نام ءٙ روم ئے الاٹ اٙت۔ بلے 11 نمبر روم بلوچ خان ءِ نام ءٙ الاٹ بوتگ اٙت۔ بلوچ خان ءِ روم سک دلکش ءُ براہ دار اٙت چہ دُرستانی روم آں یک جتائیں رنگے ءٙ اٙت۔ پدا زِر ءِ لھم لھمیں گوات کہ چہ دریگ ءٙ روم ءِ تہ ءٙ نرم نرم ءٙ اِیر کپتگ روم ءِ لزت ئے گِیش کُتگ۔ اِے روم ءِ تہ ءٙ باز مردم ءِ نندگ ءِ جاگہ ھم ھست اٙت۔ یک مردکے ھست اٙت سکیں ناشرے اٙت اِیشی نام مسٹر وکیل اٙت۔ اِیشرا بلوچ خان ءِ روم بے کساس دوست بوتگ اٙت۔ ایشی ھچ نہ لوٹ اِتگ اٙت کہ اِے روم بلوچ خان ءِ نام ءٙ بہ بیت۔ ایشی بلوچ خان ءِ روم ءِ پچگرگ ءِ ھاترا وڈ وڈیں پندل ساز اِت بلئے مدام بے سوب بوت۔ باز رند ءٙ مسٹر وکیل ءٙ بلوچ خان ءٙ گوشتگ اٙت من تو ھر دوئیں نزیک نزیک ءٙ نشتگ اٙنت یک دین ءِ منوگِر اٙنت بائد اِنت تو روم ءٙ منی نام ءٙ الاٹ بکن۔ بلئے بلوچ خان مسٹر وکیل ءِ ھچ وڈیں دانکاں چے رازی نہ بوت۔ مسٹر وکیل ءٙ بلوچ خان ءِ سنگت ھم گوشتگ اِت اٙنت روم ءٙ وتی نام ءِ الاٹ کنگ ءِ واستہ۔ بلئے کس چہ مسٹر وکیل ءِ چرپیں دانکاں رازی نہ بوتگ اٙت۔ بلوچ خان ءٙ روم مسٹر وکیل ءِ نام ءٙ کنگ نہ منّ اِت ءُ ھچ وڈ ءٙ مسٹر وکیل ءِ نام ءٙ وتی روم ءِ الاٹ کنگ ءٙ تیار نہ اٙت۔ گڑا گُڈی ساھت ءٙ مسٹر وکیل ءٙ لھتیں ناشر کار ءُ زور ءٙ ور راہ دات گوشت ئے برو اِت بلوچ خان ءِ 11 نمبر روم ءٙ پروش اِت منی نام ءٙ بکن اِت۔ گڑا اِے ناشرکاراں مسٹر وکیل ءِ گپ زُرت۔ ماہ ءِ 27 ھپتُمی شپ ءٙ بلوچ خان ءِ روم 19 منٹ ءٙ پروشت 48 نمبر کُت ءُ مسٹر وکیل ءِ نام ءٙ کُت۔ نوں بلوچ خان ءِ روم ھما اِنت 48 نمبر روم ءِ نام ءٙ زانگ بیت۔ بلوچ خان ءِ روم ءِ رنگ نوں پھک بدل اِنت۔
گڑا یک روچے در کسانی ءِ سنگتے ءٙ منا گُشت بیا باریں رواں بلوچ خان ءِ پچ گِپتگیں روم ءٙ چاراں۔ وھدے ما بلوچ خان ءِ روم ءِ چارگ ءٙ شُتاں۔ گڑا گارڈے اُشاتگ اٙت پدا مئے بلوچی شلوار مزنیں گِیر والا اِت اٙنت گُشتے ” ٹھرئیے اپنی شناخت کروائیں ” بلے ھمد ءٙ چار مردم اتک دو مردم تھری پیس اٙت ءُ دو مردم ءٙ سیاھیں پشک گورا ءُ اسپیتیں شلوار پادا اٙت ایشانی شلوار تنک اٙت اٙنت جان ءٙ لِیچتگ اِت اٙنت گارڈ ءٙ ایشان ءٙ ھچ نہ گُشت ” ٹھرئیے اپنی شناخت کروائیں ” انچو یکدم گوشت اٙنت ئے ” سر جی تشریف فرمائیں۔ ” ما گڑا وتی پجّار کنگ ءٙ رند دیمترا کِنزِت اٙنت تاں دیست بلوچ خان ءِ روم ءِ سبزیں رنگ مٹ بوتگ سُھریں رنگ ءٙ اِنت۔ روم چہ آکساں سینگار اِتگ۔ بلئے آکس دُرا مُردگی آکس آنت۔ ھر کس کہ آکساں گندیت آ سک بیم ءِ آماچ بیت آئی جان ءِ پُٹ تیوگ ءٙ پاد کایاں۔ ھر آکس ءِ سر ءٙ یک کِسھے نبشتہ اٙت۔ آکسانی سر ءِ کسھانی وانگ ءٙ مئے چمانی ارس رِتکاں جیگ تیوگ ءٙ مِیس اِت دلاں آسے روک بوت۔ سنگت ءٙ بلاھیں ھوڈُسکگے جت من ءٙ گُشتے اے بُرز ءِ آکس ءٙ بچار ایشی سُور ءٙ یک ماھے ءٙ گیش نہ اِنت ایشی آکس اد ءٙ لگّ اِتگ۔ اے گپ ءٙ ما دوئیں سک پدّرد بوتاں۔
سنگت ءٙ پدا منا زُرت ءُ وتی ترو ءِ گِس ءٙ بُرت۔ من ءٙ گوشت ئے باند ءٙ آئید اِنت تو ھمد ءٙ بہ جل مرو۔ آئید روچ اٙت یک جنکے ھمد ءٙ آتک سکیں شر رنگے ءٙ اٙت کُوڈی یے بڈ ءٙ ات ئے۔ سنگت ءِ تُرو ءٙ را گُشتے مئے آرت کُٹِتگ اٙنت مارا ماھے بیت ما پھک لنگڑاں۔ من ھلک ءِ گِس گِس ءٙ شُتا آرت پہ بدل زُرتگ ھر کسی آرت پہ بدل من ءٙ پِر اٙنت۔ تو منا پنچ گلاس آرت پہ وام بدئے ھر وھد ءٙ مئے آرت کایاں پدا تئی آرتانی بدل ءٙ من ترا دیاں۔ گڑا سنگت ءِ تُرو ءٙ پنچ گلاس آرت ءِ جاگہ ءٙ دہ گلاس آرت دات۔ پدا گوشت ئے اے آرت من ترا انچو داتگاں من ایشانی بدل ءٙ ترا نہ لوٹاں۔ اِے ھم گُشتے ھر وھدے کہ ما پس ءٙ کُشاں تئی گوشت ءِ بھر ءٙ زھگے ءٙ دِیاں تئی ءٙ راھے دیاں۔ جنک ءِ دست ھِنی اِت اٙنت سک وش پُل کشِتگ اِت اٙنت۔ من ءٙ سنگت ءٙ گُشت ھما آکس کہ 48 نمبر روم ءٙ گند ئے بُرز ءٙ لگّتگ اٙت۔ من ترا گوشتگ اٙت کہ اِیشی سُور ءٙ یک ماھے ءٙ گِیش نہ اِنت آکسے ادا لگّ اِتگ۔ اے جنک گوں وتی بُرزءُ ڈیل ءٙ بارگیں، گوں شِیر درُشمیں رنگ ءٙ، گوں چماں آھوگیں ءُ کاٹاریں پُونز ءٙ، بُرواناں کُبلیں، لنکوکاں شپاریں، ملگوراں سیاہ بزیں شپاریں ءُ نازیں داباں ھمائی مھروانیں جنین اِنت۔ بزّکار جنوزام اِنت ءُ زندگی ءِ مُراداں بے مُراد اِنت۔ بچارگ ءٙ آرت ءِ کوڈی یے سر ءٙ اِنت ھلکیں چورھیں ءُ آبیتکیں دمکاں ویل اِنت۔ گوں اِے دانکاں گُش ءِ دل ءٙ کارچے ءٙ لگّ اِت ءُ گونڈلیں تیرے ءٙ سُبت۔
سنگت ءٙ منا گُشت بُرواں ڈنّ ءٙ ترو تاب کناں دل ئے گوات ءٙ دیاں۔ ما ڈنّ ءٙ ترو تاب ءٙ اِت اٙنت تاں لھتیں گونڈو لیب ءٙ انت۔ آئید روچ اٙت لھتیں گونڈو ءٙ شوک شوکیں گُد گورا اٙت ءُ وش وشیں چپل ءُ بوٹ ءِ پاد ءٙ اٙت۔ لھتیں گونڈو شپاد اٙت ءُ لھتیں گونڈو ءِ چپل ءُ بوٹانی تا تا دِگر دِگر اِت اٙنت۔ لھتیں گونڈو ءِ پشک دراج ءُ لھتیں گونڈو ءِ گونڈ اٙت اٙنت۔ لھتین ءِ پشکانی بٹن گار اِت اٙنت ءُ جیگ ءِ پٙچ اٙت۔ لھتین ءِ پشک چاک چاک ءُ مانداتگ اِت اٙنت لھتین ءِ رنگ لگُشتگ اٙت۔ گڑا سنگت ءٙ من ءٙ گوشت اِے گونڈو کہ چو لاچار ءُ بزّگ اٙنت۔ اِے ھمایانی چُک اٙنت کہ آکس ءِ 48 نمبر روم ءٙ جتگ اٙنت۔
