منی بوجیگ ماں کَڈّو نار ءَ بلو انت۔ داں چم میم کنت ھچ وڑیں سنگارے ءُ ھمراھے گندگ ءَ نئیت۔ کندو ھم ما باز روچانی پنداں پشت داتگ انت۔ زِکّیں ھیلو ءَ ماھور ھم آبرَشت ءَ ھرجان جت انت۔ بوجیگ پانات ایں ءُ تیل ھم ھمنچکاں کہ بس کندو ءَ سر کن انت۔ نوں مارا باز روچ گوستگ۔ جانشو ھم دلسیاہ انت،،،، گمان بیت کہ اوپار روچ پہ روچ نزورتر بیان انت،،، جانشو صبر ءِ چادر ءَ درّان انت۔ بریں تو!،،،،، ءُ ،،،،،،،،بریں من!۔۔۔۔۔۔۔ بس ھمے توار گوشاں کپان انت۔ ناھٗدا جانشوانی ناتپاکی ءَ سک تکانسر انت۔ جانشوانی کوکار ءُ سلواتاں روچ آسر بوت۔۔۔۔۔۔۔۔۔۔۔ نوں سانجارو انت۔۔۔۔ ھرکس ءَ ھیلو نہ کنگ ءِ غم گشے پیر کنان انت۔۔۔ ماھور ءِ دِرتکیں ٹٗکّرے پہ ساچگ ءَ مہتل انت۔ بلے ناتپاکی دست ءِ کاراں پچ گران انت۔۔ بندیک ھلاس بیان انت بلے جانشو وتی اڑاں مانگیشّان انت۔
مرچی پدا ھیلو نہ بیت۔۔ ماھور ھم کلبنج نہ کتگ۔۔ زاناں مرچی لیٹ واب ءَ نئیلنت۔۔ گْوَرم داں دپّان ءَ چیست بیان انت۔۔۔ گِرد ءِ چیر ءَ آبرشت ءِ چُلُوپَگانی توار گیش بیان انت۔۔۔
من زاناں ناھُدا آگاہ انت ءُ جانشواں ھم بوجیگ ءِ غم پِر انت۔۔۔ بس ناتپاکی ءَ ھیلّت پچ گپتگ۔۔ اگاں نا انچوک ءَ ماھور ریتکگ ات ءُ کلبنج بستگ ات ءُ درست پہ وشّی ءُ ایمنی بہ وپتین ایں۔۔۔
مرچی ناتپاکی واب ءَ نئیلیت۔۔۔
