آزمانک : شررنگیں زرجان

زرجان شررنگی ءٙ باج بُرتگ چو ماہ ءٙ بے درور اِنت۔زرجان یک ساھے ءٙ توام اِنت۔ زرجان ءِ مٹ ءُ درور ھچ نیست ھرکس پہ زرجان گنوک ءُ ھُدوناک اِنت۔ بے کرار ءُ بے چاڈ اِنت۔ زرجان وتی مٹ وت اِنت توسیپ ءُ ستا ءِ ھچ مھتاج نہ اِنت۔ زرجان ءٙ انچو من گِنداں گیمرتگیں دل گرکے جنت۔ لُنٹ آپ دِینت دل گُشیت زرجان ءٙ بچار کہ بچار وتی چماں ھچ چست مکن۔ زرجان چو پری ءٙ اِنت زرجان ءِ چارگ ءٙ دل ھچ سیر نہ کنت۔ زرجان مدام سینگار اِتگ ءُ پلگاریں۔ زرجان ءِ کُنّنل ایں گوش دُرّا پُراں۔ زرجان ءِ گونڈیں ھٙنیچّگ ءٙٙ شمس بے وڈ براھداریں۔ کِید سرا سک ڈولداریں۔ گُلباگیں جیگ چُڑینتگ ٹاسنی جتگ۔ زرجان ءِ سرجمیں نازاکیں جان چہ سھت ءُ زیور ءٙٙ کماتگ۔ زرجان پہ وڈے براہ دنت سک درپشناک ایں۔ بلے زرجان ھلک ءٙ اٙس ءِ وڈا گرم اِنت۔ دُزّ ءُ ڈُنگ، پُلنگ ءُ رستر سک باز اِنت۔ باز براں دُزّاں زرجان ءِ دُّر پُلِتگ اٙنت۔ اٙنگتاں دُزّ ءُ ڈُنگاں وتی چم پہ زرجان ءِ سُھر اں داشتگاں۔
درست دلمانگاں کہ زرجان ءِ نازُرکیں جان ءِ لڑ ءُ باریں سُھراں پچگِراں۔ من اُوں زرجان ءِ ھلک ءِ نندوکے اں۔ من اے نہ وشیں ندارگ ءٙ ھم گِندگ ءٙ ھوں۔ من نہ لوٹاں منی چم ءِ کٙل ءٙ یکے زرجان ءٙ بہُ پُلیت۔ روچے یکے کئیت منا دل پٙٹ کنت گُشیت تو چہ زرجان ءِ ھلک ءٙ بِلّڈ اے گُژنگیں رستر ترا ھم وراں چیا کہ تو گوں زرجان سانگ بندی ٹاھینتگ۔ بلے من ءٙ زرجان ءِ ھلک سک وش بیت۔ من پہ زرُک جان ءٙ شِیدا ءُ بے چاڈ اُوں۔ منا سک دیر اِنت من پہ زرجان زامات بوتگوں کس تنیگہ سرپد نہ اِنت۔ الم نہ اِنت ھرکس چہ سیرا پیسر سرپد بہ بیت۔ تہنا لھتیں سنگت ءُ برات بس سرپدانت کہ سانگ ءِ دیوان ءٙ ساڈی بوتگ اٙنت۔ من بجاری کناں بائید اِنت دوست ءُ سنگت وتی برات پہ وس ءُ واک منی کُمک ءٙ بکناں۔ من لوٹاں گوں زرُّک جان ءٙ سیر بکناں۔ من چہ سنگتے ءٙ بجاری لوٹ اِت منا جُست کُتے تو زاناں کدی زامات بوتگ ءِ من گوشت دہ سال بیت۔ پدا جُست کُتے love Marriage یا Arrange Marriage ئے من گوشت لوو میرجے گڑا من ءٙ گوشت ئے منی ناکو ءٙ را شریں تُوشترے ھست پہ بجاری ترا دیانے۔ من گڑا چہ گٙلہ سک بال بوتاں۔
من وتی سیر ءِ تیاری کُتگ بجاری کنگ ءٙ یاں۔ تُری ھرچی بیت بِلّے بیت من چہ زرجان ءِ ھلک ءٙ ھچبر نہ لڑاں۔ زرجان ءِ گران بھائیں مھر ءُ باپیں بدن منا چہ زرجان ھچ وڈا سست ءُ جِت ءٙ کُت کنئگ ءٙ نیلاں۔ تُری آزمان ءُ زمین بُڈک اٙنت من زرجان ءٙ یل نکناں۔ زرجان ءِ شِیرکنیں بچکند زرجان ءِ مھلبیں بوءُ باس منی زرد ءِ ابیتکیں دمکاں تاھیر بکشاں۔ زرجان ءِ بھِشت ایں دلبند بِلّے زدگ اِنت بلے منی دائمی واب جاہ اِنت۔ من گوں زرجان بے وپائی ءُ دٙگہ کُت نکناں۔ تاں ساہ روت ءُکئیت من زرجان ءٙ وتی دستانی دل ءٙ داراں۔
من زرجان ءِ مِھراں ندرنجاں پاھو ندیاں ءُ دست ءِ وت وتی واھگ ءُ آرماناں نہ کُشاں۔ من اُوں زاناں ادا شِیرکنیں لِیلو لِیل زدگ بنت۔ نازاکیں امباز بے تاھیر بنت۔ بچکند ءِ وشیں نشا پروشنت۔ سھڑینتگیں شپانی پاس وڈالیگ بنت۔ ھو نرمُکیں زانسر بے چاڈ بنت۔ آرمان پہ گلے سھڑینتگ ءُ نازینتگاں کُوشیں زانسرانی تاھیراں پچگِراں۔ ھما وش الھان ایں نازینک اں درد بکشایاں۔ ھما مھرانی نرمُکیں گور زِیم کنگ بنت۔ لِیس ءُ لباس پدرد باں۔ واھگ کلمانٹ بنت۔ زرداں آس بلیت۔ ماھکانی ءٙ ماھگر گیپت شپ وتی سیاھیں چادر ءٙ مانپوشیت۔ کلمانٹیں زرجان ءِ آبریشمیں بدن پہ بانوری دوچی ایں گُدئے ءِ امبازاں تلوس اِیت۔ دست پہ ھِنی ءٙ زراں۔ مُزواک نرمُکیں لُنٹانی گِلہ کنت۔ کاشیں مھپر کلکشان ایں گِیوارے ءٙ زریت۔ چمانی کجّل اں ارس ءِ ھار بارت۔
گڑا موسم وتی رنگاں مٙٹ کنت۔ کوہانی دیم ءٙ کُوکِرے چست بیت۔ گِروک گرند بیت زرجان ءِ ھلک ءٙ ھور بیت۔ جمبر بس شلیت کہ شلیت کوھانی گّٙر ءُ جُرّ کُور ءُ شِیپ ھار بنت۔ پُلنگ ءُ رستراں چِیر بئیگ ءِ جاگہ نہ بیت۔ دُرستاں ھار بارت۔ آزمان ءِ دیم ءٙ سنج ئے درکئیت۔ گوات ءِ شِیکگ ءٙ جان ءِ پُٹ پاد کایاں۔ درچکانی سبزیں تاک شپنت۔ لامُوئیں کپوت ئے بال کنت۔ سوج ءُ سر پنتاں میار پِر نہ بیت۔ اُپار ءِ چکاس ءِ سند جنت۔ منا وتی مھروانیں زرجان رسیت۔ زرجان ءِ بھشت ایں دلبند منی واباں مانا کنت۔