میر ھمّل وھدے پہ شیر ءِ سر ءَ گوں جوان مردی ءَ ھملَو کنت گُڈا شئیر ءِ تہ ءَ ھما گپّ ءُ کِسّہ سکّ وشّیں رنگے ءَ بیان کنگ بیتگ اَنت ۔۔۔۔ھمّل گوش ایت
بِرستگیں ھژگَرد اوں اڑائینتگ
ھَر دُکیں دستاں مان اڑائینتگ
رپت اوں گوں نر شیر ءَ مِڑائینتگ
بیست ءُ چار گُلبوگ من وتی ھَلّینت
ھژدیا شِلّیں گونڈلاں پِرّینت
تیراوں چہ مَلّ ءَ جَت اناگاہ ءَ
بر سَر ء شیر ءَ مست ءُ گُمراہ ءَ
درست مزار ءِ ماں سینگ ءَ وارت اَنت
اِنتوھان ءَ ءُ نارگاں کپتگ
ھمّل شیر ءِ سرا ھملہ کنگ ءِ وھد ءَ وتی تعریف ءَ گوں شیر ءَ کنت کہ تو من ءَ کسانیں مردمے سرپد مہ بئے من انچوش پہ دیمیں مردمے نیاں ھمدا مارا شئیر بازیں رنگاں دست کپ ایت باز جاگہ ءَ ھمّل ھپت جن ءِ جود، باز جاہ ءَ سئے جن ءِ جود ءُ لھتیں گوش انت چار جَن ءِ جود البت من ادا پہ درور چار جن ءِ جود والا بند ایر کنگ آں۔
من ھمّل ءِ جیئند ءَ مڑایانی
چار مزن پادینکیں جَن ءِ جوداں
یکے ماں شال ءُ یکّے ماں شیشار
یکے ماں مستونگ ءِ بدْرنگان اِنت
یکّے ماں نامانی بَسول باگیں
اِشاں من ءُ سیاہ پہ یک شپے گولیں
انگت منی کوہ باز کہ نیم شپ ءَ زین اِنت
ھوش اوں گوں جدگال ءِ جنک ءَ اِنت
ھمّل شیر ءَ کُش ایت ءُ ھمے شپ ءَ روت وت ءَ پہ مہگنج ءِ گورگیں کُلّ ءَ سر کنت ءُ راہ ءِ سرجمیں ھالان ھم آئی ءَ دنت کہ تئی کلوہ ءُ کاسدانی سر بئیگ ءَ گوں من شپ ءَ در کپتگ آں کہ تئی ودارنی دمان ءَ آسر بہ کناں۔۔۔۔یک برے مہگنج باور نہ کنت بلے ھمّل آئی ءَ شیر ءِ پاداں پیش دار ایت کہ بُرّ اِتگ ءُ گون ئے بنت۔۔۔۔وھدے جنک اشاں گِند ایت دستاں سر ءَ جنت گوش ایت ھمّل تو من ءَ چوش شات نہ بئے کہ گوں شیر ءُ رستراں جنگ بہ دئے من سکّیں ردے وارتگ کہ تو پہ من ھاتر ءَ بلاھانی دپ ءَ بیتگ ئے۔۔۔۔
نِشت ءُ نر شیر ءِ کِسّہ اوں کَشتگ
گوں زبادانی بانُک ءَ گُشتگ
رُمب زیر ایت چو مُرگ ھوائیگ ءَ
گِرد ترّین ایت دست ءُ باھیگ ءَ
جنت منی چینی کاگدیں دیم ءَ
جھل من آ سرزاناں پنیریناں
اوھے اوھے کہ اوھے من باتاں
اوھے من باتاں گوں وتی کاراں
در رَوات چَکّ اوں گردِن گوں ھاراں
پہ شپی شوھازے تر اوں دات انت
بلے ھمّل آئی ءَ تسّلہ دنت ءُ گوش ایت کہ تو پریشان ءُ نِگران مہ بئے من اول رند نہ اِنت گوں چشیں بلاھاں ڈیکّ وارتگ اے منی مدامی کار اِنت من ھر وھد ءَ چشیں پُر ھتریں دمان دیستگ ءُ پہ مردی گوازینتگ انت۔۔۔۔ھمّل گوش ایت
تو مہ پروش دست ءِ لولیاں گَبّیں
آپ مہ کن سرزاناں پنیریناں
گم مہ کن کُلّ ءِ شر سریں بانی
باز بری مرد ءُ شیر شِکارانی
گوں ھمک شیران کن اَنت گاڑی
ھمّل گوں مھگنج ءَ شرّیں مُلاقاتے کنت گوں آئی ءَ دیوان ءُ ھم مجلس بیت ءُ پدا ھمے شپ ءَ چہ رژنائی ءُ مردمانی پاد آیگ ءَ پیسر سیاہ ءَ سوار بیت ءُ در کپ ایت ءُ پدا کہ شیر ءِ جاہ ءَ گِند ایت تاں شیر کپتگ آ چہ شیر ءِ جان ءَ تیراں کَشّ ایت ءُ گوں وت زیر ایت کہ دگہ برے کار دئے انت پدا پہ وتی ھلک ءَ واتّر بیت۔۔۔۔
رُکست اوں گِپتگ چہ پری رنگ ءَ
سیاہ ءِ دُر گوش اوں بوتکگ چہ بَند ءَ
تَرّاں پہ دوشیگیں پَد ءُ رند ءَ
اتکگاں شیر ءِ ھَند ءُ جاگاہ ءَ
زُرتگ انت تیر اوں یک پہ یکّیگ ءَ
کیسّگاں جاہ دات اَنت کِنّکیگ ءَ
پیدَھاں کاینت وھد ءِ سکّیگ ءَ
چہ ھمّل ءُ شیر ءِ کِسّہ ءَ پدا ما یک رندے پدا وتی سفر ءِ نیمگ ءَ کائیں کہ لیاقت مارا کلمت ءِ تیاب ءَ گردینگ اَت کہ زِری ملّیراں مئے ترْانگ دیر بُرت انت ھمّلءِ ایندگہ کِسّہاں دیمتری بھرانی تہ کارایں۔۔۔۔
ما کلمت ءِ ھُور ءِ ترّ ءُ تاب کُت ءُ یک برے پدا واجہ لیاقت ءِ لوگ ءَ اتکیں اے بری لیاقت ءَ بازیں ورنایے ھم لوٹاتگ اَت ۔۔۔۔ما لیاقت ءِ بیٹک ءَ نشت اُشتری شیر ءَ گوں جوڈ کُتگیں شیر چاہ وارت۔۔۔۔ورناھاں کلمت ءِ جنجال ءُ مشکل واجہ بھرام ءِ دیم ءَ ایر کُت اَنت گوں ما شرّیں دیوان ءُ مجلسے کُت اُش۔۔۔۔۔کلمت ءِ اے ورنا ءُ جوان کہ لیاقت ءَ لوٹائینتگ ات انت درْاہ شرّیں سرپدیں چاگردی ورنا اَت انت گوں لبزانک ءُ سیاست ءَ آھانی ھُبّ ءُ واھگ باز اَت بلے کلمت ءِ دیرپاندیں سفر ءُ پدمنتگی ءَ آ چہ ھمک پِڑ ءَ پَشت گپتگ اتاں پمیشکہ وت ھم چہ وتی جِند ءِ بودِشت ءُ صلاحیت ءَ ناواقف اَت انت۔۔۔
(روان اِنت)
