کلمت ھَمّل ءِ جنگانی (بُنگیجی بھر)

ھردیں کسے ءَ من ءَ سفر ءِ سلاہ جَت تہ اے ھبر ءِ "اِنّاں” کنگ پہ من سکّ گرْان بیت۔۔ھنچوش کہ گوک پہ کڑب ءَ دِرک بند ایت ھنچوش من پہ سفر کنگ ءَ ھدوناکاں۔۔پمیشکہ منی زند ءِ گیشتریں روچ گوں مُھیمّاں گوزان اَنت۔۔ھمے پیم یک شپے گوادر ءَ من گوں داؤد کلمتی، بِجّار بلوچ ءُ بھرام بلوچ ءَنندوک اتاں گڈا گپّ گپّءَ من ءَ بھرام ءَکلمت ءِ سلاہ جت کہ پوشی جمعہ ءِ روچ ءَ تو سرگِر ما شما پہ "کلمت” ءَ سفرے ءَ رویں۔۔۔چہ ھمے شپ ءِ شَور ءَ پد 26 فروری 2021 ءِ سُھب ءَ من واجہ بھرام، داؤد کلمتی، لال بخش آزاد ءُ ڈاکٹر مجید چہ گوادر ءَ دیم پہ کلمت ءِ سفر ءَ راہ گِپتیں۔

بھرام بلوچ وانندگ ءُ کوھنیں اھوالکارے ءِ پجّی ءَ یک جوانیں چاگردی کارکنوکے اے وھد ءَ آرسی ڈی سی گوادر ءِ نائب صدر ءُبلوچی میوزک پروموٹرز سوسائٹی ءِ ھزانگ داری ءِ اگدہ ئے گون اَنت ۔۔۔داؤد کلمتی گوادر پورٹ ءَ ڈائریکٹر اِنت بلوچی میوزک پروموٹرز سوسائٹی ءِ بُنجاھی صدر اِنت ساز ءُ زیملءُ زبان ءِ دوستدارے، ھنچوش لال بخش آزاد ھم کوھنیں سیاسی ءُ ادبی سنگتے بلوچی زبان ءِ شرّیں نبشتہ کارے ، ڈاکٹر مجید ءَ ھم وتی زبان ءُ راج دوست بنت۔۔۔۔۔اے پیمیں یک ھم تبیں ٹولی یے ءَ گوں یکجاھی ءَ سفر انچوش وشّ بیت دل نہ گوش ایت کہ سفر آسر بہ بیت۔۔۔مرچی ھم گوں سفر ءِ بِندات ءَ سنگتانی بُنگپ ادب ءُ سیاست ءِ سر ءَ اَت۔۔۔روکپتی بلوچستان ءَ پہ لاپ ءِ ھاتر گوستگیں ھپتگ ءَ یکجاہ 13مردم مرز ءِ سرا ایرانی پاسدار ءُ سپاہ ءِ دست ءَ بے گُناہ کُشگ بیتگ انت ھما اِنت کہ ایران ءِجاور ھال نگیگ اَنت ۔۔۔۔۔سنگت ھمے بُنگپ ءِ سرا بلوچ ءِ بزگی ءُ بدھالی ءِ بابتءَ گپ جنگ اتاں کہ ایران ءِ بلوچاں پہ یکجاہ کنگ ءَ ھچ پیمیں سیاسی سروکے نیست پمیشکہ آھانی کوش ءِ ھلاپ ءَ بیتگیں احتجاج ءُ شور ادارُکی اَنت ءُ پدا زیت اے شور ھلاس بنت ءُ گپّ داں جاھے ءَ نہ رس ایت۔۔۔۔
ما کِساس سُھب ءِ دہ بج ءَ گوادر ءَ دراتکگ ءُ کوسٹل ھای وےءِ مزنیں روڈ ءَ چہ نلینٹ ءِ زیروپوائنٹ ءَ پیتک ءُ پہ کلمت ءِ نیمگ ءَ روان اتیں۔۔۔۔مئے راستی نیمگ ءَ کَپّر ءِ تیاب ءُ وش کوشیں میتگ ءِ راہ گیشگ ءَ اَت ءُ چپّی نیمگ ءَ نلینٹ ءِ وش زیدیں زمین ءُ میتگ درا اَت اَنت۔۔۔بلوچستان ءِ سفر کنگ ءِ مستریں وشّی ھمیش اِنت راہ اگاں ستر دیر ءُ ناوش بہ بیت بلے زید ءُ ندارگانی گِندگ ءَ گوں مردم ءِ ژندی ھلاس بیان بیت ۔۔۔۔چمّ کہ نِدارگاں چِنان بنت تہ بالاد ءَ ھم چاڑے گون کپ ایت۔۔۔بلے مرچی بھرام ءِ گاڑی ءِ شیشگ انچوش سیاہ ات اَنت کہ مردم پہ ڈنّ ءِ نِدارگانی گِندگ ءَ بے وار ات۔۔۔۔لال بخش آزاد ھم گوں بھرام ءَ ھمے گِلگ ءَ کنگ ات کہ تو گوں اے سیاہ کانچیں گاڑی ءِ زیرگ ءَ مرچی مئے چَمّانی ھکّ زُرتگ اَنت۔۔۔۔گوں مئے نُرنڈ ءُ پُرنڈاں بھرام ءَ گاڑیءِ شیشگ جھل کُت انت ءُ مارا رَد دیان ءَ گوشت ئے شیشگ بِلّے جھل اَنت ڈنّ ءِ گوات ھم وشتر اِنت۔۔۔بلے اے کوسٹل ھای وے مزنیں شَھدگ ءَ گاڑی کہ یک سد ءُ بیست ءِ اسپیڈ ءَ روگان اِنت گوات ءِ ژپّ ژپّ کُج ءَ مردم ءَ شیشگانی جَھل کنگ ءَ کِلّ اَنت۔

ھیر سفر روان ات پدا اے راہ ءِ گِندگ پہ مارا چوش ھم الّمی نہ اَت پرچاکہ اے راہ ءَ ماھے یک رندے ما درست سفر کنوک اتیں پہ کراچی ءِ روگ ءَ مئے درستانی راہ ھمیش اِنت۔۔۔کِساس 11 بجءَ ما پسنی ءِ زیروپوائنٹ گوازینت ءُ دیم ءَ روان اَتیں۔۔۔شادی کَور ءِ رسگ ءَ گوں من ءَ "نورک بینجو والا” گیر اتک کہ آئی ءِ میتگ ھمدا کَور ءِ سر ءَ اِنت۔۔۔”سِندی پَسو” نامیں کسانیں میتگے کہ ادا کساس دہ ءُ دوازدہ کرگینیں لوگ بنت کہ نورک بینجو والا ھمے لوگانی تہ ءَ نِشتگ ءُ زند گوازینگ اِنت۔۔۔۔نوربکش نورک کہ بُندر تُربت ءَ آپسری مردمے مرچاں ھمدانندوک اِنت۔۔۔۔نورک ءَ نوں وا وتی زند ءِ گیشتریں بھر وارتگ ءُ گوازینتگ بلے آئی ءَ ورنائی ءِ وھد ءَ گوں بلوچی ءِ مزن نامیں گشندہ ناکو سبزل ءَ ماں دیوان ءُ مراگاھاں یکجاہ محفل کُتگ سبزل ءِ وشیں گُٹّ ءِ پَچّ نورک ءِ لنککانی کمال بیتگ کہ آئی ءِ لنکک رِچوک بیتگ اَنت پمیشکہ آئی ءَ بینجو پہ رنگے ءَ توار پرماتگ۔۔۔بے نورک ءَ سبزل ءِ سوتانی تہ ھما وشّی ءُ لِزّت نہ بیتگ کہ گوں نورک ءَ بیتگ۔۔۔2018 ءِ سال ءَ وھدے ما "بلوچی میوزک پروموٹرز سوسائٹی” ءِ سنگتاں پہ ناکو سبزل ءِ شرپ ءَ کیچ ءَ یک ساز ءُ زیملی دیوانے ٹھینت گڈا پرے دیوان ءَ ناکو سبزل ءَ مارا ھمے ڈکّ جت کہ منی شرپ ءَ کہ مراگش بیت گڈا نورک بینجو والا ھر پیم ءَ آرگ بہ بیت پرچاکہ بے نورک ءَ من ناسرجم آں۔۔۔۔گڈا ناکو سبزل ءِ واھگ ءِ پدا مئے سنگتاں نورک چہ شادی کَور ءَ لوٹائینت چہ ھمدا ما نورک ءَ سرپد بیتیں کہ شادی کَور ءِ ھمے کسانیں میتگ ءَ وتی بزگی ءُ لنگڑی ءِ زند ءَ گوازینگ اِنت۔

وھدے نورک پہ ناکو سبزل ءِ مراگش ءَ کیچ ءَ کَیت گڈا واجہ گلزارگچکی چہ مراگش ءَ یک دو روچ پیسر آئی ءِ بینجو ءَ گوں جتگیں سازاں ریکارڈ کنت چہ ھمے ریکارڈنگاں یکّے وتی فیس بک ءِ اکاونٹ ءَ چہ "وئیرڈ انسٹرومنٹ” نامیں پیجے ءَ ایر کنت۔۔۔مھلوک ھمے کساس ءَ اے ویڈیو ءَ چار اِیت لائیک ءُ شئیر کنت کہ اے ویڈیو چہ 30 ھزار ءَ گیش رند ءَ شئیر کنگ بیت ءُ کِساس 14 لکّ ءَ گیش چارگ بیت۔۔۔۔نورُک ءِ اے ساز پمیشکہ دری مھلوک ءِ گور ءَ سک باز چارگءُ دوست کنگ بیت کہ زگریں بلوچی زیمرے بیت۔۔۔۔پدا چہ برازیل ءَ یک گروپے گوں واجہ گلزار ءَ رابطہ کنت کہ اے مرد ءَ درگیج ما اشی ءَ لوٹائینیں ھمودا پروگرام ئے دئیں ۔۔۔پدا واجہ گلزار گچکی اے مرد ءِ سرجمیں ڈسّ ءُ ڈٹیلاں ھما برازیلی گروپ ءِ سرا دیم دنت بلے پدا ھما بلوچ ءِ گپّ کہ "بے بھت ءِ کِشار بے دان اِنت” نورک ءِ نستگیں بھت ءَ برازیلی ھم چہ آئی ءَ بے ترْانگ بنت ءُ ادا ھم نورک ءِ وپتگیں بھت پاد نئیت۔۔۔بلے البت ءَ چہ کراچی ءَ یک ٹی وی چینلے آئی ءَ وتی پروگرام ءَ لوٹائین ایت۔۔۔۔ اے بری ھم آئی ءَ بلوچی میوزک پروموٹرز سوسائٹی کمک کنت ءُ ھمے پروگرام ءَ دیم دنت۔۔۔۔چرے ویڈیو ءَ پد دگہ ھم کمّیں کُمک آئیءَ رس ایت۔۔۔بلے
” پہ پِنڈُکی ھیتاں لال کُمیت پزّور نہ بیت
اگاں پزّور بیت گڈا ترْدوک نہ بیت ”

پدا دگہ برے واجہ گلزار گچکی پرائیءِ گِندگ ءَ آئی ءِ لوگ "سِندی پَسو” ءِ میتگ ءَ روت تہ نورک گوں آئی ءَ گوش ایت "شما بہ نِند اِت من رواں چہ ھمساھگانی لوگ ءَ وتی بینجو ءَ کاراں”
گڈا آ ھیران بیت ءُ جست گِپت ”تئی بینجو ھمساھگانی لوگ ءَ پرچہ ایر اِنت تو وتی لوگ ءَ چی ءَ ایر ئے نہ کن ئے ؟”
نورک پسّہ دنت کہ "منی لوگ ءِ سر پَچ اِنت من ھمے تُرس ءَ ادا ایر ئے نہ کن آں کہ اگاں ھَور بہ بیت تہ بینجو ءَ آپ لگّ ایت ءُ ھراب بیت منی زند ءِ مستریں مَڈّی ءُ ھزانگ ھمے بینجو اِنت۔۔۔”
استاد نوربکش کہ بلوچ آئی ءِ نیم نام ءَ نورک گوش اَنت اے زمانگ ءَ چہ بلوچی ءِ مستریں سازگراں یکّے کہ شادی کَور ءِ دامن ءَ انگت ھم پہ شُد ءُ لنگڑی وتی زند ءِ پشت کپتگیں روچاں تیلینگ اِنت۔۔۔ بلوچانی اے مزنیں ازمگر پہ لاپ والی ءِ شوھاز ءَ گوں دریا ءِ چَولاں لیب کنت ءُ جانشوی کنت۔۔۔سرکار ءَ چہ بُندر ءَ بلوچ ءُ آئی ءِ ازمکار ءُ ھُنرمند درکار نہ اَنت بلے راج ھم چہ وتی اے پیمیں ھستیان بے ترانگ ءُ شموشکار اِنت۔۔۔۔
(روان اِنت)