چہ مزنیں مُدّتے ءِ گوزگ ءَ پد مھگنج ھمّل ءِ نیمگ ءَ کُلوہ ءُ کاسد کنت کہ نوں دیر گوستگ تو من ءَ وتی عشق ءِ بندیگ کُتگ ءُ وت شُتگ ئے پدا دوبر آیگ ءِ نام ءَ نہ زان ئے ۔۔۔۔وھدے ھمّل ءَ وتی دوستیگیں مھگنج ءِ کلوہ سر بنت گُڈا "سیاہ” ءَ سنج کنت ، جُلّی لانک ءَ کَید کنت تیر ءُ کماناں زیر ایت پہ مھگنج ءِ دیدار ءَ شپے شپ در کپ ایت۔۔۔سیاہ میر ھمّل کلمتی ءِ اسپ ءِ نام بیت ءُ "جُلّی” آئی ءِ زھم ءِ نام بیت۔
اتکگ اَنت پیگام گوں گِداریگاں
گوں شَپی نوداں لُڑّگانیگاں
کُہسری کبگاں کرامگانیگاں
لسّہ ئیں آھوگاں مُجانیگاں
ٹیٹل ءُ مورتاں سر شپانیگاں
بانِکاں مِسک ءُ مہلبانیگاں
کاڑ مزن پادینکیں ھمک بیگاہ
کاینت ءُ نِند اَنت من گور ءُ گیگ ءَ
دیر کُتگ ھوتیں ھمّل ءُ تیگ ءَ
گوں ھمے گالاں جھہ جَتیں مردی
زُرت کمانے ءُ جابو ئے رِندی
بست وتی لانک ءَ ڈکّ اوں دات ھِندی
لوٹ اِت اوں میرزائی کُمیت کَوشیں
کَشّ اِت ئے گولانی پِیلّ پتن نیشیں
آرتگ اَت ٹِیھ ءَ "سیاہ” مزن گواتیں
زین اوں ماں چَکّ ءَ دات مُگُل ساچیں
پادوں ماں تاسیں دورَواں داتیں
پُشت ءِ وشّ وشّیں مھپل ءَ نِشتیں
شپ اول پاس ءُ ماھِکان رَنگیں
سر دَیان شور دات سیاہ پُلنگ ونگیں
ھمّل وھدے وتی اسپ ءَ سوار بیت آئی ءَ شور دات ءُ سکّ تیز بارت ھِچّ گَر ءُ گَٹّ پجّاہ نیار ایت انچوش پہ بیھوشی روان کنت ۔۔۔سیاہ چوناھا سکّیں تیزگام ءُ راھبُرّیں اسپے بیت گوں ھمّل ءِ شور دئیگ ءَ سُستی نہ منّ ایت ءُ روان کنت ھمدا ھمّل گوش ایت۔۔
مَلّ مِر ایت مہلنج ئے بلاہ زیر اِنت
من مِراں بے پول ءَ بہشتیگاں
مَلّ ءُ مہلنج پہ دل ءَ دوست اَنت
کمتر ءَ مَلّ ءُ گیشتر ءَ مہلنج
مجلس ءَ مہلنج ءِ شپانیگ ءَ
مَلّ منی ڈَکّانی سَتم زیر اِنت
ھمّل ھمے شپ ءَ ماکولا ءِ آتراپاں چہ در کپ ایت ءُ دیم پہ بیلو ءَ رَوگ ءَ بیت ھمے شپ ءَ ماں کوھی شیپ ءُ گَرے ءِ تہ ءَ گوں شیری ءَ ڈیکّ وارت ۔۔۔شپ چوش کمیں تہار بیت ھمّل یک برے شیر ءَ پہ شرّی درست نہ کنت بلے شیر پہ ھمّل ءَ جَبِزگ کنت۔۔۔۔ھمّل چار ایت کہ شیر من ءَ جنت ءُ وارت گِھتر ھمیش اِنت گوں شیر ءَ مقابل بہ باں۔۔۔۔اے وھد ءَ ھمّل نوک ورنا بیت ءُ ھون ئے گرم بیت ۔۔۔سنج ءُ سِلاہ بیت۔۔۔ گوں شیر ءِ اول ھملَو ءَ آ جُلّی ءَ چہ لانک ءَ کَشّ ایت گوں شیر ءَ جنگ دنت ۔۔۔۔شیر ھم سُستی نہ منّ ایت بلے ھمّل زانت کہ اے تیاریں شیر ءَ گوں من اگاں جنگ مہ دئے آں اے من ءَ جَنت ءُ پرْوش ایت پمیشکہ آ گوش ایت انچو پہ بزدلی چہ شیر ءِ دست ءَ وارینگ ءَ گِھتر اِنت کہ گوں آئی ءَ جنگ بہ دیان ءُ وت ءَ بہ واریناں ۔۔۔۔بلے ھمّل گوں جوش ءُ جزبگ ءَ شیر ءَ گوں مِڑ ایت داں شیر ءَ جنت ءُ دور دات پدا چہ کمانگ ءَ لھتیں تیر ھم شیر ءِ پھناتاں دنت ۔۔۔نی گِند ایت کہ شیر مُرتگ دویں پادانی بُرّ ایت پہ مھگنج ءَ بارت کہ آ بِزانت من پرائی ءِ گِندوک ءَ چینچو مزنیں ھترھاں چہ گوستگ ءُ اتکگ آں دان بیلو ءَ وت ءَ سر کُتگ۔
نوں بیا اِت ھمے نِدارگ ءَ ھمّل ءُ شِیر ءِ شئیری بندانی تہ ءَ سئیل کنیں۔۔۔۔۔۔
اول ءَ کہ ھمّل شیر ءَ گِند ایت ءُ پجّاہ ئے نیار ایت تہ گوش ایت۔۔۔
اَچ من ءُ ساری سیاھگے رُستگ
من دل ءَ گوشتگ بَنّوی کَنڈے
بَنّوی کَنڈے یا سُتکگیں بُنڈے
سُتکگیں بُنڈے یا رھسری سِنگے
رھسری سِنگے یا کوھسری مَمّے
چو نہ زانتگ کہ لُدّوئیں شیرے
وھدے ھمّل شیر ءِ نزیک ءَ رس ایت شیر گُرّگاں اِشکُنت نی زانت کہ من ءَ بلاہ ءَ وارتگ ھمدا شَئیر چوش گوش ایت۔۔۔
رپتاں داں نوکی ءِ سری سُنٹ ءَ
پربِِھیں شیرے کپتگ چو کُنٹ ءَ
گَرّگ جنت ءُ ھپ سر ءَ سِرّ ایت
ھینز ءُ نامرد ءِ زھرگ ءَ دِرّ ایت
شیر چار ایت کہ لھمگیں مردے
بُز شِپانکے ءُ گوکی گُوّالے
یا بیلوی جدگالے نہ سرھالیں
یا جنوزامی ھام دپیں بَچّے
یا بے دلیں شَہریگے لگور ماتیں
گوں اول ھکّل ئے بہ سرْھمیناں
بارگیں کرزی ئے بہ درْنزیناں
گوں کَش ءِ کَلّیگ ءَ بہ روت لوگ ءَ
شیر وت ءَ کَنسیں رسترے لیک ایت
میر وت ءَ کانیں مِھتری بَچّے
گون اَتاں شیر شَش سِلاہ جَنگی
چَنگُل ءُ چاریں نیش اَتاں بَلّیں
کَئید من ءَ "جُلّی” اَت سِگار سبزیں
اِسپر اوں پالوش اَت بلاہ جَلّیں
جابہ اوں پُرّ ئے تیتکگیں تیر اَت
سیاہ منی اولاک اَت کَلم گوشیں
شیر گُرّ ایت چہ تَمبَئی پُشت ءَ
تیگ نُرْنڈ ایت ماں سریمگیں جُتک ءَ
"او منی واجہ شَرّ ءُ شاھیگیں
تو منی زنزیری رہ ءَ شیپ کن
گردن ئے کانڈیلی مہ تِرْینزیناں
چہ گِتاچانی بندگ ءِ جاہ ءَ
بَمبو ءِ ترشیپ اوں ھرام باتاں”
سَیکل ءُ سَجّگ ھر سباھانی
ھمّل تئی پاگ ءِ مِسک ھُراسانی
زی چَما بَکّال ءِ گَور ءَ گِپت اَنت
ماں منی الماسیں رہ ئے مُشت اَنت
(روان اِنت)
