منی وشتریں گُشندہ نورخان بیزنجو

نورخان بیزنجو 4 دسمبر 1969 پسنی ءٙ گلام سرور بیزنجو ءِ لوگ ءٙ وتی چمّاں پچ کنت۔ نورخان ءٙ وتی بنداتی وانگ چہ پسنی ءٙ دربُرت۔ ایف اے چہ عطاشاد ڈگری کالج تربت ءٙ در برتگ ءُ بی اے چکاس ھم چہ عطا شاد ڈگری کالج تربت ءٙ پرائیوٹ پاس کُتگ۔ نور خان بلوچستان شاہ دربرجاہ ءٙ ایم اے اولی سال ءِ چکاس ءٙ پاس کنت بلے گوں ساز ءُ زیمر ءِ بازیں ھمگرنچی ءٙ دومی سالے سرجم نہ بیت وانگ ءٙ یل ءٙ کنت۔ 5 اگست 2003 تربت کوشکلات ءٙ وتی وپتگیں واب ءٙ اے کوڈھیں دگنیا ءٙ چے سپر کنت۔ نور خان ءٙ گوں ساز ءُ زیمل ءٙ باز مھر ءُ دوستی بوتگ آئی ءٙ زیمر ءِ دربرگ ءٙ باز جہد کُتگ گوں وتی فن ءٙ ایماندار بوتگ۔ نور خان بیزنجو باز نامداریں اِزمگر ءُ ساچست کارے بوتگ۔ نورخان بیزنجو موسیقی چہ پسنی ءٙ استاد اعجاز علیءُ چہ استاد عمر بلوچ ءِ کِرّ ءٙ کراچی گولیمار ءٙ دربُرت۔ بلوچی زبان ءِ گُشندھانی تہ ءٙ نورخان بیزنجو یک بلاھیں ھستی ءِ نام ءٙ زانگ بیت۔ ساز ءُ زیمل ءِ پِڑا نورخان یک سوھو ءُ سرپدیں گُشندھے اٙت۔ نورخان ءٙ گشندھی ءٙ گوں ھوار شائری ھم کُتگ۔ ھستیں دور ءِ بازیں گشندھاں چہ نورخان ءٙ باز رنگ زُرتگ۔ منی دل دوست ءُ وش تواریں گُشندہ نورخان بیزنجو اِنت۔ نورخان ءٙ کساس ھژدہ سال بیت کہ چہ اے رپتگیں دگنیا ءٙ سپر کُتگے بلے من انگت نورخان ءٙ گوشداراں۔ ھرکس آنگ ءٙ نورخان ءٙ گوشداریت نورخان ءِ گوشدارگ ءٙ دل ھچ سیر نہ کنت۔ نورخان ءِ گوشتگیں سوتانی شیرکنی انگت بے چاڈیں زرداں تاھیر بکشاں۔ من وتی زند ءٙ گوں نورخان ھچ ڈیک نہ وارت بلے من روچ ءِ مرچی نورخان ءِ بلاھیں شیدائے اوں من ءٙ نورخان سک دوست بیت۔ یک وھدے من ءٙ نورخان ءِ گوشتگیں سوتانی بلاھیں بھرے پہ دل یات بوتگ ءُ انگت من ءٙ بازیں سوتے یات اِنت۔ اِیشی مستریں سوب ھمیش اِنت کہ من درکسانی ءٙ نورخان ءِ الھان کُتگیں سوت بے کساس گوش داشتگاں ءُ روچے مرچی ھم من نورخان ءٙ گوشداراں۔ نورخان ءِ شئرانی ترز ءُ سلیکشن انچیں وڈے ءٙ بوتگ تو ھر شئرے کہ گوشدار ءِ ترا ھر شئر چہ دومی شئر ءٙ دگہ رنگے ءٙ گندگ ءٙ کیت ءُ ھرکجام شئر ءٙ را وتی یک جتا جتائیں تام ءُ لزتے گوں۔
من ءٙ یات اِنت 2005 ما دو سنگت تربت ءٙ زور بازار ءٙ استاد رفیق ءِ کلب ءٙ شتاں استاد رفیق ءٙ نورخان ءِ بابت گپ کُت گوشت ئے ما یک رندے مسقط ءٙ پروگرامے ءٙ شُتگ اں گڑا پروگرام ءٙ چے پیسر نورخان باز شراب وارتگ سک نشہ بوتگ۔ گڑا من ءُ استاد رسول بخش فرید پریشان بوتگاں کہ نورخان نشہ اِنت گانا جت نہ کنت لئیہ اٙوٹ بیت ما کم شرف باں شتر ھمیش اِنت نورخان گانا مہ جنت۔ گوشت ئے مردماں نورخان بڈا کُتک اسٹیج سر ءٙ آورتگ۔ گڑا رسول بخش فرید ءٙ بینجو ءِ تار سستگ نورخان ءٙ گوشتگے تو گانا مجن یکے تو نشہ ءِ او دومی بینجو ءِ تار سستگاں بینجو نہ بیت۔ گوشت ئے نورخان ءٙ گوشتگ نا نا بینجو ءٙ شر کن ھر وڈ بیت من گانا گوشیں۔ گڑا استاد رفیق ءٙ گوشت نورخان ءٙ نشہ ھالت ءٙ گانا گوشتگ ھچ لئیہ آوٹ نہ بوتگ۔ استاد رفیق ءٙ نورخان باز ساڈات گوشت ئے نورخان بلاھیں گشندھے بوتگ تُری ھر وڈ ءٙ نشہ بوتیں بلے وتی لئیہ آوٹ نہ بوت۔ نورخان یک سوتے جنت اِیشی ویڈیو ھست اِنت
"منی درد ءِ سرشپانی منی ماہ دیدگانی ”
” تر ءٙ روچ کنات ساھیل تر ءٙ چُکات ماھکانی ”
ھمے سوت ءِ تہ ءٙ استاد رفیق ٹِیکہ ءٙ رد کنت گڑا نورخان چک ءٙ ترینیت گوشیت بابا کوپگو کوپگو اِیشی ءٙ چے پدّر بیت نورخان بلاھیں استادے بوتگ آرا وتی گانا گوشگ ءِ وھد ءٙ ردھم بینجو درسانی ھیال گور بوتگ۔
نورخان بلاھیں ھستی اٙت بلے چما زوت سست ءُ جت ءٙ بوت۔ نورخان ءٙ گِشتریں ٹھاٹھ آنی تہ ءٙ سوت گوشتگ پدا ھر ٹھاٹھ ءِ جتا جتائیں راگ اٙں نورخان ءِ سوت گِیشتر تامدار ءُ شِیرکن کُتگ اں۔ ھمے وڈ ءٙ نورخان ءٙ جِتا جِتائیں ٹِیکہ ءُ چال ءِ تہ ءٙ وتی سوت گوشتگ اٙں اِیشاں نورخان ءِ سوتانی لِزّت گِیش تامدار کُتگ۔
نورخان ءِ لھتیں انچیں گوشتگیں سوت ھست کہ آیانی الھان کنگ سک گِران زانگ بیت بلے نورخان ءٙ گوں وشیں وڈے ءٙ الھان کُتگاں ءُ شئر تامدار کُتگ اں انچو منیر مومن ءِ شئر ے
” نالان اٙنت دگہ رنگیں مرچی اے دل ءِ شانتل واتر کن دوبر گِران اِنت ”
ما سستگ ءُ دور دات اٙنت زھیرانی درھیں بانزل واتر کن دوبر گران اِنت”
نورخان ءٙ وتی سوت پہ وڈ الھان کُتگ اٙنت۔ نورخان ءٙ دومی کال ءٙ بِگر تاں پنچُمی کال ءٙ درسیں کالانی تہ ءٙ سوت الھان کُتگ۔ نورخان ءٙ بِزاں جھلی سُر ءُ بُرزیں سُرانی تہ ءٙ وتی سوت ھم وش گوشتگ اٙنت۔ گوش داروک تنیگہ نورخان ءٙ گوش داراں وشنود باں۔ بُرز ءِ سُرانی تہ ءٙ جاگھے نمیرانیں نورخان سک وش گوشتگ۔ انور صاحب خان ءِ شئرے
” شرابی کدّھاں چم آسکی دیدگ ھُماریناں ”
” تھار ماھیں شپ ءِ سیاھی تئی ماھپر شپاریناں” ھمے وڈ ءٙ دگہ جاگھے مراد ساحر ءِ شئر ءٙ الھان کنت
” پرے ھال ءٙ گُلیں یار ءٙ کنائیں”
” آ دردانی شریدار ءٙ کنائیں”
اے شئر ءِ انتر ءٙ بُرز ءِ سُرانی تہ ءٙ نورخان ءٙ پہ وڈے الھان کُتگ اں۔
نورخان بلوچی موسیقی ءِ تہا غزل ءِ بادشاہ زانگ بیت۔ نورخان ءِ ہارمونیم سر ءٙ گوشتگیں غزل بے مٹ اٙنت دل ءٙ انچو تاھیر بکشاں گوش ءِ گِیمُرتگیں دل ءٙ پدا ساہ مان بیت۔ منیر مومن ءِ شئر ءٙ الھان کنت
” درد ءِ چراگیں دیدگ تھاراں روک کنت دل ءٙ ” اِستال ءُ ماہ ھم تئی راز داراں روک کنت دل ءٙ ”
نودانی ارساں آپ کُرتگ اٙنت درست کنجل شپ ءِ”
بے وابیں ماہ ءِ دیدگ کُماراں روک کنت دل ءٙ ”
نورخان ءِ ھر گوشتگیں سوتاں درد، تام ءُ لزّت مان۔ ھؑمے وڈ ءٙ سُروز ءُ باجہ ءِ سر ءٙ نورخان ءِ الھان کُتگیں سوت سک شِیرکن اٙنت۔ عطا شاد ءِ شئرے
” آس وتی گِس وتی سِنگ وتی سر وتی ”
” زیمیں دل ءٙ کُجا براں تیر وتی جگر وتی ”
ھمے شئر ءِ مکتہ ءٙ وش الھان کنت
"دل کہ سُچیت اگاں عطا شِیر کنیں گال زھر بنت
ما تئی ھیال ءِ ساھگاں مارا ملیک در وتی ”
ھمے نوار ءِ تہ ءٙ دِگہ جاگھے نورخان عطا شاد ءِ دگہ شئرے گوشیت
گُنگیں اے زبان پرچے لھڑیں دل ءِ پاھار ءٙ ”
"ارسے نہ کپیت پرچے اے رولھیں چمّار ءٙ ”
نور خان سازءُ زیمر ءِ پِڑا یک درپشناکیں استالے اٙت بلے زند ءٙ گوں نورخان وپا نہ کُت نور خان زوت اے دنیا یل کُت۔ نور خان ءِ گڈی پروگرام مند ءِ پروگرام اٙت چہ مند ءِ پروگرام ءٙ نورخان ءُ استاد عارف کایاں تربت ءٙ گڑا نور خان تربت ءٙ عارف ءِ لوگ ءٙ شپ ءٙ وسپیت داں سُھب ءٙ دیرءٙ نورخان چہ واب پاد نہ اِت۔ وھدے نورخان ءٙ چہ واب ءٙ پاد کنگ ءٙ باں تاں گنداں نورخان نوں دائم ءٙ واب کپتگ بِزاں وتی دائمی واب جاہ ءٙ شُتگ۔ نورخان ءِ گوش داروک ءُ لوٹوک گوں نور خان ءِ آناگتیں مرگ ءٙ گمیگ ءُ بے چاڈ بوتاں ساز ءُ زیمر پُرسیگ بوت شائرانی شئر آبیتک آبیتک اٙنت نورخان ءِ کنڈ تنیگہ پچ اِنت کس ءٙ پُر نہ کُتگ۔
نورخان گوشیت "وتی قوم ءٙ گوش دار اِت وتی قوم ءٙ برداشت کن اِت مستریں قومیت ھمیش اِنت "۔ اِیشی ءٙ پدّر بیت نورخان راج دوستے ھم بوتگ۔
استاد !!
"روچے تئی جتائی ءٙ برباد بیتگاں
دردانی مسکیں میتگ ءٙ آباد بیتگاں "(مبارک قاضی)
"مرچی تئی دیدار ءِ گماں دیدار کناں
باند ءٙ وتا را باریں کجا من گار کناں”(میر عمر میر)
"کئیہ گوشتگ منی ءُ ماھ پری ءِ سُھل ءُ تران بیتگ
اگاں بیتگ بِزاں بیست ءُ نو ءِ شپ ماھکان بیتگ”
(سید ظہور شاہ ہاشمی)
"ھزار بھشت بھا پہ گل ءِ گلابیں چم
ندیست جھان ءٙ من آنگ ءٙ اے ڈول دابیں چم "( جی آر ملا)
"زھیر ءُ ترانگ چہ واب ءٙ پاد کایاں
دوست ءُ دلبر کہ مارا یاد کایاں ” (زبیر مختار)
” مئے ھدوک ءُ واھگ ءُ ھُبانی چمداری نہ شُت
چہ منی نام ءٙ تئی ٹھلانی بیزاری نہ شُت "( کریم دشتی)
"مئے ترانگانی ارس چہ تئی دیدگاں شلیت
آسے کہ وازمندی ءِ شھر ءٙ مئے بلیت "( غلام حسین شوہاز)
” بیا کہ من ءٙ تی زھیر کُشاں
کانچ ءِ وڈ ءٙ بچکند پروشاں "( ارشاد پرواز )
نمیرانیں اُستاد نورخان بیزنجو ءٙ دُرسیں مزن مزنیں شاعرانی شئر گوں وتی وشیں توار ءٙ سک وش الھان کُتگ آں۔ نورخان ءٙ شائرانی شئر انچیں رنگ ءُ دروشم ءٙ گوشتگ اٙنت چرائی ءٙ ھر شائر ءِ شئر ءِ ھک شریں وڈے ءٙ سرجم بوتگ بِزاں نورخان ءٙ گوں شئراں اِنساپ کُتگ۔