یک بنی آدمے مُرت ایدگے آئیارا کَلّ کنگءَ برگءَ اتنت- بازیں مردم میّت ءَ گوں روگ ءَ اتنت- لھتیں کسان، لھتیں مزن، لھتیں ورنا،لھتیں پیر ھریکّےءِ سرجہل ات، لہتیں مردماں گریوگ نیاھگ ءَ ات آھاں ھوں وتی پونزءَ دزمال ایرکتگ ات-لہتیں کوپگ دیگءَات ءُ لہتیں وتی باریگءِودار ءَ ات-ھرکسءَکہ کوپگ داتگ ات آکسانیں کسانیں مُچّیءِ تھا بھر بیتگ اتنت-لھتیں ایوک ءَ روگ ءَ ات لہتیں وتی سنگتاں-
دومردم آھانی اُمر چِلّ سال ءَ بُرز اَت وت مہ وت سُک سُکی ءَ اتنت یکے ءَ دومی ءَ را جست کُت:
,,اڑے مامد میّت ءِ کَلّ کنگ ءَ ءُ فاتحہ ءَ دیر دار ایت؟،،
"منی ھیال ءَ دو کلاک دار ایت-،،
"دو کلاک ءَ وَ بازار ءِ خانہ خراب بیت واگڑ-،،
"قبرستان ءِ روگ ءِ چے زلورت انت چہ ھمدا واتر کن-،،
"کرپاس ءِ بازار ءَ چونا ءَ ھر وھد ءَ گڑ بڑیں-،،
"پدا ترّ منی برات عزیز-،،
آدوئیں کس کرپاس ءِ بازار ءَ سٹّا ءِ جنگ ءِ ھاترا چہ یک تنکی ءَ گار بیت اَنت-میّت مردمانی کوپگ ءَ ات دیم پہ قبرستان ءَ روگءَات-یک مُچّی یے کہ چہ میّت ءَ کمو گِستہ ات یک ھاسیں بُنگپّے ءِ سرا گپّ ءَ اتنت-,, ھرکس ءِ کہ سکرات گران بیت آھانی گناہ اے دگنیا ءَ شودگ بنت-،،
"بزّگ دو روچ ءَ سکرات ءَ اَت-،،
"بھت ئےِ نیک انت قبر ءِ عذاب ءَ رکّ ات-،،
"قبر ءَ عذاب رسیت زاناں؟ یک ورنایے ءَ جست کت-
"ھو! ”
"بلے مُرتگیں اندام عذاب ءَ چوں زانت؟،،
"ھُدا ءِ کاراں دست درازی مکاں-،،
"درستاں قبر ءِ عذاب سگّگی ایں زاناں؟،،
"ھو! ھریک مومن ءِ سرا ھمے روچ آئیگی انت-،،
"ھماکہ آس ءَ سُچنت ءُ ھما مومن کہ آپ ءِ تھا بُڈّنت مِرنت آھاں قبر چے ھساب گریت-،،
مُلّا زھرگپت گْوشت ئےِ منی ھیال ءَ تو کالج ءِ بچکّے ءِ گوں تو سرجنگ گْوشئے شیطان ءَ گوں ھم کلام ئے، لاحول ولا….،،
ھمے ٹولی ءَ رند سئے مردم وت مہ وت گپّ ءَ ات انت-،،
"بس بھت مُرت-،،
"ھو! دو روچ ءَ بزّگ سکرات ءَ ات-،،
"دراہیں اُمر ءَ شرّیں کارے ھوں نہ کت-،،
"شوکی ایں مردے ات، سئے سیر ئےِ کتگ ءُ ھپت کشمیری خانہ بدوشیں جنکّ ھوں پہ بھا ئےِ زُرتگ اَت-،،
"اسلام ءِ تھا مولد ءِ ایر کنگ ءِ اجازت انت-،،
"نہ انت،،
"است انت،،
"بلے چہ مولداں کمائینگ ءِ اجازت نئیں-،،
"دندہ کنائینتگ ئےِ زاناں؟،،
"گڑا ھرکسی ءَ گوں آئی ءِ تعلق بیتگ-،،
"مزنیں مزنیں پولیس افسر ءُ سیٹ مدام آئی ءِ سلاماں اتکگ انت-،،
"استغفر اللہ -،،
"بد بھت مُرت،،
یک کماشے میت ءَ را کوپگ دات دومی کماش ءَ را گْوشت:
,,باز نیکیں انسانے اَت-،،
"من نام باز اِشکتگ اَت-،،
"ھپت جنوزاماناں ھرچ ءُ درچ ئےِ داتگ ات ءُ آھانی لجّءِ ھوں ھیال کتگ ات ئےِ-،،
"ھیرات ئےِ ھوں کتگ اَت-،،
"سئے حج ھم کتگ ات،،
"ھُدا ءِ نیکیں بندگ پہ وت ءَ اے جہان ءَ ھوں جنّت ءَ جاگہ تیار کن انت-،،
یک مزورے ءَ گام ئےِ جت اتک آھانی نزیک ءَ جست ئےِ کُتنت-,, ھما انسان کجا بُروانت ءُ چہ گریبی ءَ پہ وت ءَ آخرت ءَ ھوں جاگہے تیار کت نہ کن انت-،،
دوئیں کماشاں مزور ءَ را روک روکءَ چار ات-یک کماشے ءَ چہ وتی چماّں چمشک کشّ اِت، سپا کت گْوشت,, منی ھیال ءَ تو گیرمُلک ءِ جاسوسے ءِ-،، دومرد ءِ چہ بازیں چربی ءَ گلّیر جہل کپتگ اتنت-لاپ اِش ڈنّ ءَ درکپتگ اتنت-آ چہ درستاں رند ءَ پَشکپتگ اتنت، سگریٹ ءَ کشّان اتنت گپ ءَ اتنت-،،
"اے مرد ءَ ھوں مروچی مرگی ات-یکے شنبے ءِ دراھیں پروگرام ءِ دیم سیاہ بیت-،،
"یکے کہ گیشتر زنڈاَت آئی ءَ درّائینت
,, مروچی کوھلی شہزادہ ءَ الّم ءَ کٹّ اتگ ات-،،
"ءُ سیمی ریس ءَ دلیپ کمار ءَ الّم کٹ اتگ اَت-،،
"دلیپ کمار کئیگ انت؟،،
"آ وَ وتی بائی پستول والائیگ انت، ھما کہ ہندوستان ءَ جنگ چوپ ءِ فلم جوڑ کنت، اے ھمائی ءِ اپس انت-،،
"ھو! ھو نی زاناں اے ھما اپس انت کہ آئی ءَ چہ سیٹ کریم ءَ یک لک دہ ھزار ءَ گپتگ ات-،،
"توراست گشئے، پیسر ءَ آئی ءِ نام راج کمار اَت-بلے دادا بائی ءَ ترینت دلیپ کمار کت-،،
"یک زنڈے ءَ سگریٹ دؤردات گْوشت
,, وت کمبھت مُرت مارا ھزارانی نقصان دات ئےِ،،
"لھتیں مردم زند ءَ ھوں بوج انت- مِرَنت ھوں بوج انت، !!Bloody fool،،
کمّیں گِستہ ءَ یک ورنایے ءَ دومی ورنا ءَ را گوش ءَ گْوشت,, اڑے اے دوئیں زنڈاں گندئے اے ھُدامرزیءِ شرّیں سنگت انت-،،
"راست؟،،
"ھو اڑے ھمے سئیناں ھاشم کٹی ءَ گوں ھور اسمگلنگ کتگ-،،
"ھُدامرزی ءَ ھوں-،،
"ھو اڑے ، اِشی ءَ ٹکّا یے نیست ات پدا باز کمائینت ئےِ-،،
"تو اِشاں شرّی ءَ زان ئے زاناں؟،،
"ھو! چرائی مرگ ءَ لہتیں روچ پیسر من آئیارا کارچ کشّت پیش داشت کہ زرّ نہ دئے تئی چُکّاں کُشاں، چرائی ءَ زرّ پچ گپت-،،
"زرّ ءِ دیگ ءَ انکار نہ کت ئےِ،،
"کنجوس ات چو بکاّل ءَ، کارچ ئےِ دیست زرّ ئےِ دات-،،
"بلے ھیرات ھوں باز کتگ ات ئےِ-،،
"شراب ءِ اسمگلنگ ءِ زرّاں چارمی بھر، بھر کتگ اَت-،،
دیر یک مردے پریشان ات چمّ ئےِ ارس ءَ پُر اتنت-پریشانی چرائی دیما پدّر ات- دگرے ءَ آئی ءِ کوپگ ءَ دست ایرکت تسلّا ئےِ دات گْوشت,, تو پرچہ گمیگ ئے؟،،
"آئی ءَ پسّو دات وتی سر جھل کُت-
,, تئی برات انت زاناں-،،
"اِنّاں،،
"سنگت ایں،،
"گڑا تو چو گمیگ ئے،،
"مئے گریبانی سکّی سوری ءَ ھور اَت،،
لھتیں میّت ءَ گوں ھور روگ ءَ اتنت وت مہ وت گپّ ءَ ات انت-
"اڑے ما ھچ نہ کت پہ وت ءَ،،
"درائیں زند گوں جنگ چوپاں گوازینت-،،
"اے دولت، اے جاگہ، اے نام ھچ کار ءَ نیا انت، ھرکس رؤت چنکے ھاک ءِ تھا کلّ کنگ بیت،،
"گُڈّی سفر وَ الّم انت-،،
یک بزّگیں مردے ءَ وتی ارس پھک کت انت گْوشت-
,, من چہ مرگ ءَ-پیسر یک چکن تِکّہ یے ورگ لوٹاں ءُ بالی گراب ءَ سواری ءَ دل لوٹ ایت-،،
گوں میّت ءَ ھور ھُدامرزی ءِ ورنائیں بچّ کہ سرئےِ جھل ات نرم نرمیں گاماں روگ ءَ ات-آئی ءَ نوکیں سیاھیں شیروانی یے گورا ات، پہ ھمے روچ ءَ دوچائینتگ ات ئےِ-دزمال ئےِ دست ءَ ات-دزمال ءَ را امونیاءِ لھتیں پٹّ بوکلیٹس تیل ئےِ جتگ ات پہ چماّنی ارسیگ کنگ ءَ دزمال ءَ چماّں دارگ ءَ ات آئی ءِ ارس ھُلک ھُلک ءَ رنگ ءَ ات انت-
یک مسکینے ءَ گْوشت,, واجہ ھُدامرزی ءِ یک جوڑی یے گُد من ءَ بدئے مھتاج آں برھنگ آں-،،
"اِنّاں ھُدامرزی ءِ دُراھیں گُد مُلّا ءَ دیگ بنت-،،
"مُلّا ءِ گورا گُد مُچّ انت، زیک یکّے مُرتگ آئی ءِ گُد ھوں ملّا ءَ رستگ انت، ملّا مپت ءَ بھا کنت اش-،،
"بکواس مکن-،، ورنا ءَ ھکّل دات گْوشت-
,,شرّیں گڑا سئے فاتحہ ءِ ورگ ءَ بیایاں؟،،
"سئے فاتحہ ءِ ورگ شاہ صاحب ءِ لوگ ءَ رونت-،،
"شاہ صاحب ءِ لاپ سیر انت آئی ءِ کُچکّانی لاپ سیر انت واجہ منی چُکّ شدیک انت-،،
"تئی چکّ چہ سیّد آں بُرز نہ انت-،،
مسکین ءَ آئی ءِ پسّو اِشکت یک کرّ بیت-
میّت انسانانی کوپگ ءَ ات اتک قبرستان ءَ سربیت انت- ھُدامرزی ءِ ورنائیں چکّ ءَ قبرستان ءِ نیمگ ءَ چمّ شانک دات انت کوکّار کت گْوشت-
,, اڑے اے چے یے!،،
دگرے گْوشت-,, اے قبرستان انت،،
"اے وَ میوا شاہ قبرستان،، ورنا ءَ پہ زھر گْوشت-
,, بلے قبرستان ے،،
"انّاں ادءَ لس مردم کلّ کنگ بنت-من وتی زرّداریں پت ءَ کوآپریٹو قبرستان Eternal ءَ دگے مردماں گوں ھور کلّ کناں-،،
مردم ھیران بوتنت اِنگو آنگو چارگ ءَ لگّ ات انت کہ قبرستان ءِ دومی نیمگ ءَ بلاھیں دیوالے ات-یکے ءَ کوکّار کت گْوشت,, واجہ اے نیمگ ءَ بیا ات Eternal اے نیمگ ءَ انت، چہ اے کِشک ءَ بیا انت-،،
میّت چہ دومی کشک ءَ کوآپریٹو قبرستان ءَ آؤرت اش-قبر تیاراَت قبر قبار قطار ءَ بستگ اتنت- میوا شاہ ءِ وڑ ءَ یک یک نہ ات انت-
رسم پورا کنگ ءَ رند میّت قبر ءَ ایردات، کمّو دیر ءَ میّت شت ھاکانی چیر ءَ- ھُدامرزی ءِ بچّ ءَ قبر کونچ ءَ را دہ کلدار دات-آئی ءَ وتی ھید پھک کت انت گْوشت,, واجہ! اے کمّ اَنت،،
"بسّ انت ترا،،
"دو کلدار پر کن اش-،،
"شھر ءَ مزور ماڈی بندنت آھاں ماں دراھیں روچ ءِ سئے کلدار مزوری دئیں-،،
"واجہ ماڈیانی تھا شما نند ات، اے قبرستانے-،،
چہ مُچّیءِ تھا یکّےءَ ٹھک دات کند انت-،،
"بلے پدا ھوں قبرءِ کونچگ ءَ دوزدہ کلدار باز انت-،،
"واجہ باز مشکل ءِ سرا سخی بابا یے مِر ایت، دوازدہ کلدار منی ھکّ انت-،،
"سخی بابا مُرت-،،ورنا ءَ جاک جت گْوشت-
مزور ءَ وتی گُد چنڈ ات انت گْوشت,, تو زاناں بھیلے ءِ؟،،
ھُدامرزی ءِ بچّ ءَ آس لگّ ات، چہ زھر ءَ درّائینت ئےِ
,, اے زرّ منی دست ءِ ھید انت من قبر ءَ زیارت یے جوڑ کناں-،،
قبر کونچ ءَ دوکلدار نہ رس ات آئی ءَ وتی کوڈال بڈّ ءَ جت شُت-
دگے انساناں یک انسانے ءَ را کَلّ کت آئی ءِ سر ءَ فاتحہ ونت یک یک بیت انت-
