وتی بلوچ بئیگ سرءَ من پَہر بنداں، بلے بلوچ بئیگ تہنا فخرءِ گپ مہ بیت ـ بلوچ مزاحمتءِ نشانیں ترا مزاحمت کارءِ بئیگ لوٹی گوڑا تئی پَہر جائزیں، مزاحمت تہنا کوہا رؤگءِ نام نئیں، وتی چاگردءِ تہا راستیئے علم چست کنگ مزاحمتءِ نشانیں، راستیں راہءِ رؤگ مزاحمتءِ نشانیں اگاں تؤ وتی چاگردءَ نشتءَ دروغءِ پلا مرضی کنے، پہ وتی ذاتی مفادءِ حاطرہ دروغءِ ہمبرا داری کنے، پہ چندءِ زرانی ھاطرہءَ چاپلوسی کنے وتی کردءَ گار کنے گوڑا تئی بلوچ بئیگ ہچ کارءِ نئیں ـ وتی بلوچ بئیگ سرءَ ہما وہدے پَہر مہ بند تا وہدی کہ تؤ وتی زمینءِ ھاطرءَ، وتی قومءِ ھاطرءَ وتی زبانءِ رکینگءِ ھاطرہ وتی چاگردءِ شریا جہد نہ کنے ـ بلوچ بئیگ ھاطرہ ترا وتی ماتءُ گہارانی عزت آئیانی حقانی پاریزگ ءُ آئیانی سرءَ بیسہ المیئیں ـ
اے مئے ماتءُ گہار مئے فخراں کہ مئے جنگءَ مڑگاہاں، راجءِ، سرزمینءِ ھاطرہ عملی جہد کنگاہاں ـ اے شھیدیں زاگانی میت منی شیر زالیں گہارانی کوپگائیں اے پہ منءَ پَہرءِ گپءِ من سد سلام وتی ماتءُ گہاراں پیر زالاں دئیاں بلے اے نی منی زمہ واریئیں کہ من کُجا بھی نشتءَ بیباں منی دل منی تؤار گوں ہمے ماتءُ گہاراں ہوار بیبت ـ مرچی منی سرڈگار ارنسیگیں، منی سرڈگار گوں منی چوکانی ھوناں ہم رنگیں، مرچی منی ساحل، منی کوہ، منی راہ، منی کوچگ، منی میتگ، منی ڈگار، منی کؤر ءُ منی دگ چہ منءَ سوال کنت منءَ چے جواب لوٹیت، تؤ اگاں وتءَ بلوچءِ لیکھے گوڑا تئی بلوچیت تئی عملءَ چے پرچہ پدر نہ بیت ـ تؤ پرچہ بہرءُ بانگءِ ـ تؤ پرچہ مزاحمتءِ راہ یلا داتءَ ـ تؤ کہ وتءَ بلوچءِ لیکھے تؤ بلوچستانءِ سر ڈگارءَ نشتگءِ شر، سندھءُ پنجاب یا دراں ڈیھءَ نشتگءِ شر گوڑا تئی بلوچیت گاریں پرچہ؟ تئی چاگرد چو وابیں پرچہ؟
مرچی منءَ فخریں کہ من بلوچیاں بلے منی عمل اے ثابت بیکنت کہ واقعی من اے فخرءِ حقداراں یا نا ـ پرچہ آ کہ بلوچ وتءَ گوشیتءُ عملءَ چے بلوچءِ وتءَ ثابت کنت آ اے گپءِ ودارءَ نہ کنت کہ تؤ وتی بلوچیتءَ عمل تہا بیارے بلکیں آ وتی جہدءَ وتی سفرءَ رؤانیں ـ چوش مہ بیت کہ تئی بلوچ بئیگ ہبر بس تئی دپءِ تامءَ بدل بیکنت بلے ترا نا ـ
