آ چہ دراھیں کپودراں گسر بوتگ ات-یک کپ ءُ تھنا پَشت کپتگ ات- کپودر ءِ یل بوئگ ءِ بازیں سوب ات انت،بلے مستریں سوب آئی ءِ ورنائی ات آئی ءِ مات ءُ پت، آئیارا وتی ہمراہ کنگ ءَ تیار نہ بوتنت-
آ دگہ گپے ات کہ آئی ءَ وتی مات ءِ ہمراہی ءَ روچے پتے دیست ءُ اے رندی کہ آئی ءِ مات ءَ آئیارا صاف جواب دات ءُ وتی ہمراہ نہ بوئگ ءِ ھاترا گر ءُ نہر دات گڑا کپودر ءَ وتی مات ءِ سرا سک بد آتک ءُ مات ءِ ہمراہ ھما سیاھیں ءُ مستیں کپودر ءِ سرا ھم کہ اے دراھیں وھد ءَ آ آئی ءِ مات ءِ لِٹک ءَ بستگ ات ءُ آئی ءَ کپودر ءِ مات شری ءَ گپ ءَ ھم نہ اشت ءُ وتی بانزلاں بال ئےِ دات ءُ دیم پہ روچ برکت ءَ مزنیں شہر ءِ نیمگ ءَ راہ گپت-
آسکّ زہر ءَ پُرات-چہ دراھیں سیادی ءُ سانگبندیان دلپروش ات-آئی ءِ کُہت درنیاھگا ات-بلے… بلے آئی ءَ وتی مات ءِ جتائی سک تورات-آسکّ تکانسر ءُ بژنیگ ات-آئی ءَ وتی نزوریں بانزل زور پر داتنت ءُ کپودرانی رم ءِ پُشت ءَ کپت-آ درا وش بال اتنت ءُ مزنیں شہر ءِ راہ ءَ ھم بلد اتنت اے چہ دراھیناں کستر ات ءُ مزنیں شہر ءِ راہ ءَ ھم سرپد نہ ات پمیشکا آ چہ دراھیں کپودراں گسر بوتگ ات- یک کپ ءُ تھنا پَشت کپتگ ات-
پراھیں آزمان ءِ دلبند ءَ آ دلوارگ ات-آئیارا سک بیم آھگا ات-آ ھیران ات چوں بہ کنت؟
چے بہ کنت؟
اےاولی بَر اَت کہ آئی ءِ مات ءَ آ یل داتگ ات ءُ آ دریں ڈیھ ءَ ایوکا پشت کپتگ ات-آئی ءَ وتی مُچیں چم شانک داتنت تاں دیست ئےِ کہ کپودرانی رم دیری گار بوتگ ات- آزمان ءِ دیما،گوات ءِ سرا آھانی پدے ھم نہ گواھگا ات-نوں وَ آ دلپٹ بوت-بازیں سفر ءَ آئی ءِ بانزل ھلاس کتگ اتنت ءُ ھمت ءُ ھاٹیگ جواب دئیگ ءَ ات کہ اناگہ آئی ءِ چم بانے ءِ سرا نشتگیں وتی عمر ءِ کپودرے ءِ سرا کپتنت-آ ھم تھنا ءُ گسر ات بلکیں آئیارا ھم مات ءُ پت ءَ یل داتگ ات ءُ پدا آ ھمے "دومی جنس،، ءِ درآمدیں کپودر ءِ کرّ ءَ بان ءِ سرا ات-شررنگ ءُ درآمدیں کپودر آئیارا گنوک کنگا ات-ھژم دئیگ ءَ ات وتی نیمگا برگ ءَ ات-آئی ءَ ھیال کت کہ راستی آ ورنا بوتگ- جوان… وتی مستروت-ءُ نوں کہ شر رنگیں ءُ مادگیں کپودر کہ آئی ءِ وت نزیک ءَ اتکگ ات وت سرا وت دیوان ءُ مجلس ءَ کپتگ ات آ بے سُد بوھان ات،بے فکر ءُ ھمے بے سُدی ءُ بے فکری ءِ تھا وھدے آئی ءَ وتی بگل ءَ اتکگیں شررنگیں کپودر ءِ بالاد چارت گڑا آئی ءَ وتی دراھیں رگانی تھا آس ءُ انگر تچگا دیست ءُ پدا ھمے درآمدیں کپودر ءِ سوب ءَ آئیارا ھال رست کہ اے وھدی آ مزنیں شہر ءِ کرّ ءَ انت ءُ ساھتے ساری آ مزنیں شہر ءِ نزیک ءَ بال ءَ بوتگ گڑا آ گنداتر گل بوت… گنداتر بےفکر بوت-آئی ءَ ھیال کت کہ زند ھمے شررنگیں کپودر ءِ امبازان انت- ھمیشی نزیکی منا ابدمان کت کنت-تاہیر دات کنت-زند بخشاھیت ءُ اے بان، بان ءِ نوک نوک ءُ چیز باید انت مئے لوگ بہ بیت-نوں جتائی ءِ دراج بُریں پند کشگ نہ بیت…نوں تچ ءُ تاگ نہ لوٹیت ءُ آئی ءَ چُرت جت کہ باید انت کہ آ وتارا شررنگیں کپودر ءِ چماّنی تھا ایر بہ دنت ءُ آئی ارواح ءِ تھا ایر بئیت- گوں ھمے نیّت ءَ وھدے آئی ءَ وتارا شررنگیں کپودر ءِ نزیک ءَ آؤرت گڑا یک اناگہ آ کہہ سرّ ات… آ ھیران بوت… اولی برا آئی ءِ چم شررنگیں کپودر ءِ بالاد ءَ چہ چست بوتگ ات انت ءُ آئی ءِ چماّں اڑیتگ اتنت- اولی رندا آئی ءَ وتی شررنگ ءِ چم پہ ھُب ءُ واھگ چارتگ اتنت ءُ پدا آ پشت ءَ کنز ات, آئی ءِ ورنائی پوڑے بوت آپ ءَ کپت، شررنگیں کپودر ءِ چم، درآمدیں کپودر ءِ چم، آئی ءِ دلبر ءِ چم سرجم ءَ آئی ءِ مات ءِ چم اتنت، ھما ترپگ،ھما مھر ءُ طلب، ھما بےسُدی ءُ ھما پہ مستیں ءُ سیاھیں کپودر ءَ ھدوناکی-اے شررنگیں کپودر ءِ چم آئی ءِ مات ءِ چماّنی جند اتنت-آ پچ لرزت، شررنگیں کپودر آئیارا گنوک کنگا ات،ھژم دئیگ ءَ ات، وتی نیمگا برگ ءَ اے، آئی ءِ باطن ءَ ھوار بوھگ ءَ ات-بلے۔۔۔۔۔ بلے آئی ءِ مستیں چم۔۔۔
آئی وتی ارواح قید کت- دل دپ ءَ آؤرت، چم بُنٹت انت ءُ پدا شہر ءِ سرا بالیں کپودرانی رم ءِ تھا ھوار بوھگ ءِ ھاترا بال ئےِ کت- آئیارا شہر ءَ رسگی ات-رم ءَ ھوار بوھگی ات ءُ مات شوھاز کنگی ات- ۔
