ھَمیش اِنت انوں الکاپیں ساھتے بیت کہ آھاں درگاہ ءِ مزنیں کُنرءِ ساھگءَ وتی اُردءُ ساماں بُتکگ اَت اَنت ـ زالبولءُ کسانیں چُک درگاہ ءِ پُشتی نیمگءِکُمبءَ دَرپانی آپ کنگءُ دزنمازءِ گِرگءَشُتگ اَت اَنت ـ
وشدل ءُ بھرام ھُشترانی رَھت گِپتگ اَت اَنت ءُ کاہ ءُکدیم ءَ دَست گَٹ اَت اَنت ـ
دو روچءِ یک کَجیں سَپرءَ دُرست ژندءُ پندکُتگ اَت اَنت کماشءُ پیریں زال انگت کُنرءِ ساھگءَپہ دَمءِ بالا کنگءَ تَچک اَت اَنت ـ
ھَئی گَرکے ــ ھَئی کن مِررر ـ ھُشترےءَ دَرنگ بَستگ اَت دیم پہ درگاہءِ کُنرءَ پیداک اَت ـ
دادرحمن اڑے دادوــ او دادو اڑے وتی ناھاریں ھُشترءَ پُلنگ ءِ دَپ ءَ دَئے گَرک کن درگاہ ءِ کُنرءَ دَپ جَنَگءَ اِنت ـ
مُلا اللہ داد کُنرءِ ساھگءَ نشتگ اَت ءُ دادرحمنءَ توارءَ اَت ـ
ھُشترءِ نِیش کہ کُنرءَ کپتاں کُنرءِ شاھڑ ژامبل اِت اَنت ـ کُنرءِ سرءَ ھِردکےءَ ڈاہ کُتءُ کُنرءِ گَرگءَ پُترت بینگ مَگیسکاں ھم ژمب ژمب بندات کُت ـ کُنرءِ بُرّانی سارتیں ءُلھمیں بو کم کمءَ شنگ بواں اَت ـ
زالبولان نوکی کمبءَ آپ کتگ اَت ءُ پادشپاددیم پہ درگاہءَ رھادگ اَت اَنت ـ
شما وتی ھَندءَ چہ زئی دَرکپتگے؟
اناں مُنجار ما پِیری سُھبءَ اَرزبندکتگ ءُ اودءَ چہ دَرشُتگیں ـ
ھاں ھاں ــ بزاں پیری سھبءَ چہ وتی جاہءَ دَرکپتگے ـ
مُنجارءَ را کارچے دَستءَ اَتءُ جوگن ءِ دستگےءَ لَتاراںءُ تیزکنگ اَت مُلا اللہ دادءَجُستءُ پدءَ اَت بلے آئی ءِ چَم یک پیم ءَ پالومپیں پَسّ ءُ سُندانی تَہءِ مُرگان سَک اَت اَنت کہ اے ساھت ناں آساھت یکے دَپءَ بُسرینت ـ
مُنجار او منجار بابی بیا مارازیارت داریں ـ ماسی گُلی ھمے مُنجارءَ ھَمنگودیم دَئے ـ دَرگاہ ءِ دَپ ءَ اوشتاتگیں لال بی بی وتی سَرءِ کَلّی درگاہءِ دپءَایرکتگ اَت ءُ مُنجارءَ توارءَ اَت ـ
بلے مُنجارءَ وتءَ کرّ کُتگ اَت ءُ سُدءَ نہ اَت ـ
منجار بابی برو چُکاں زیارت داریں ـ ماسی گُلی منجار ھال دات ـ منی وتی باااا دل گُشیت برواں دستءُ دیمے بگراں ءُ یکپارگی چکاں گوں زیارت بہ کناں بلے منءَ اے پیادگءِ پَندءَ وتی ھَرجان جَتگ ءُ بے ھاٹیگ کتگ منی ھَڈءُ بندجُگ جُگ ءُٹُکرٹُکراں من پاد آتک ءُ سُراِت ھم نہ کنی ـ
کسانیں کترھےءَ پَد زالبولاں زیارت کتگ اَت ءُ درگاہءِ دَپءَ بِسکوٹ ھیرات اَت مُنجار ءَ را پلاسٹکے دَستءَاَت کسانیں چُک چو گوبزءَ آئی ءَ پِررتگ اَت اَنت بزوبزو ــ بزو منجار مُشتءَ پُرکناں ءُ دیاں اَت ـ
درگاہ ءِ پُشتءَ مِنڈے درءَ بوت کہ آئی ءِ گوداں شِیرءَ لَٹ اَت اَنت ھُدا بزاں کہ نوک زاتگ اَت یاکہ نوکی دَپ ءُ زَنک اَت؟
مِنڈءَ کہ منجار دیست دُمبءَ سُریناں بوت ءُ تچکءَ دیم پہ مُنجارءَ شُت ـ دگہ رَمّے گُراگ ھم درگاہءِ سرءَ ساھیل اَت ءُ کواک کواک کنگءَ اَت اَنت ـ
درگاہءِ سرءَ لھتیں گنوک پہ دیم تَرگءَ اَت آھانی تہءَ یک جنیادمے گندگ بوت کہ آئی ءِ پَشک ءُ گشان درتگ اَت اَنت ءُ گُشان ءِ تَلاں چہ آئی ءِ چِلّ ءُ لیگاریں مُٹ زاھراَت اَنت ـ
مُنجارءَ دو مردم زرتگ اَت پَسّ کُشگ اَت اَنتءُ پوست کنگءَ اَت ـ
منی چُک مریدجان او ابا مریدپادءَ شنکو دستءُ دیمے بگرمنجار دست ھالیک بیت ترا زیارت دارینیت ـ
آئی ءَ کمیں جان کَشّ اِت مات چاراِت ءُ پَدءَ دیم پہ چیروپت ـ منی چُک پادءَ شنکو جاھلی مہ کن اَنچوکیں بلاھیں درگاھے ءِ سرءَ آتکگے ءُ زیارت مہ کنے اللہ وش نہ بیت ــ پادءَ منی جگرءِ ٹُکر ـ
آاِنت بچار تئ ھمسراھیں درستیں مردماں دزنمازگپتگ ءُ دیم پہ درگاہءَ رھادگ اَنت آبشیراِنت سوالک اِنت ءُ بشام اِنت ــ پادءَ منی بچ ــ پادءَ منی دلءِ بند
مات ءَ آئی ءِ میدانی تہءَ دست راہ داتگ اَت ءُ نرم نرم ءَ آئی ءِ میداں سماراں ءُ ٹوھینگءَ اَت ـ
مُنجار ءِ توار پیداک اَت ھیرات ھیرات ــ نزیکیں میتگ ءِ لھتیں کسانیں چُک تگ اَت اَنت ـ
نیم گوشت ھامگ ونڈ کتگ ءُ نیم گوشت برنجءِ تہءَ گِراداں ـ مُنجار گپءَ اَت ءُ ملا اللہ دادءَھال دیگءَ اَت ـ
ھاں ھاں انچش شَر اِنت ــ مُلا اللہ داد ءِ توار ھم پیداک اَت ـ
آئی ءَ را مات ءَ لاچار کتگ اَت ءُ گوں اَت دیم پہ کُمبءَ رھادگ اَت ـ
آئی ءِ پاداںءَ چِلیک بندیں سواساں وارتگ اَت ءُ زیادھیں ھِیدءَ آئی ءِ پَشکءَ باسکاں بگر داں کہ سِیریںءَ سُورگ بستگ اَت ـ آئی ءِ شلوار زُروکانی جاہءَ چُڑتگ اَت دگہ رنگیں بندیک ءَ اگڈی ءُچَپُڑداتگ اَت ءُ شلوارءِ پانچ ھم مزنءَ چُڑتگ اَت اَنتءُ گوں رَھت دُوچیں سِیتلیءَڈال ڈالءَ کَڈی ماں کَڈی کماتگ ءُ گُک کُتگ اَت ـ
سَرجمیں سپرآئی ءَ پہ پَند گوازکتگ اَت سَپرءَ بازجاہ ءَکماش ءُ کسانیں چُک ھُشتراں جمازبوتگ اَنت بلے آکہ چوچوریگ گاٹ ءُ نوک بروت شَنزاَت آئی ءَ وت لَج بوت کہ منی ھمسرودرست پیادگ اَنت من چہ کئےءَ کمتراں کہ ھُشترءَ جمازبہ باں ـ
راہ ءَ یکے دو جاہءَ ماتءَ آئیءَ راکڈن کت کہ مریدجان تو دَمبرتگ منی چُک کمیں ھُشترءَ جمازبوکہ تئ دم بال کیت ءُ تئ پادانی دردکمیں آرام تِربیت ـ
بلے آئی ءَ گُشتگ اَت کہ اناں من دم نہ برتگ ـ ماتءِ بازیں گُشگءَپد آئی ءَ بَس وتی کوپگءِ چاگل ھُشترءِ کتبءَ اڑینت ـ
منجار او منجار بیا مارا زیارت داریں ــ بشیرمنجار ءَ توارءَ اَت ـ مُنجار وتی ھونی ایں دستاں دیمی دُمبلءَ لتاراں ءُ ساپ کناں اَت دِرک اَت دیم پہ درگاہءَرھادگ اَت ـ
ائے پاک ءُ پلگاریں درگاہ ــ ائے بُزرگیں واجہ ءِ نندجاہ ــ اَئے گنوکانی سارکنوکیں درگاہ ــ تو ارشائے تو کُرشائے تو لوحہ ئے یاکہ تو کلمہ ئے توزمین ءَ ئے یاکہ آزمان ئے تو ھَرچ کُج ئے اے ساھتءُ دماں ءَ وتءَ بیارءُ ساڑیءُ جاڑی کن ـ اے کسانیں جوان ءِ سرءَ وت وشءُ برابر کن اے جوان ءِ دل ءُ دماگاں وت برجاہ ءُ کامل کن ـ اے جوان ءَ وت مدد ءُ کمک بو ــ اے تئ گُراگ ءُ گوتواِنت تئ مُریدءُ دستگیراِنت ـ اَئے بزرگیں واجہ ئے نندجاہ وت منی اَرزءُ پریاتاں کبول کن ـ
مُنجار ءِ دپ پچ اَت دعا ءُ پریاتءَ اَت آئی ءِ دیم ءَ نشتگیں مُرید ھَگولواَتءُ وانگ وانگءَ چمے مُنجارءِ دپءَ چارگءَاَت ءُ چمے درگاہءِ سِنگءَ ـ آئی ءَ را اَنچش گمان بوگءَ اَت کہ منجارگوں یکےءَ ھمے سرجمیں پریاتاں کنگءَ اِنت آئی ءَ وتی چم بندءُ پچ کُت اَنت بلے آئیءِ دیم ءَ درگاہءِ مِکیں سِنگءَ چہ اَبید دگہ ھِچ نیست اَت ءُ اے اولی رَنداَت کہ آ سماکنگءَ اَت من پھکا برابرءُ وش نہ آں ءُ منی سر پھکءَ شرشرنہ اِنت ـ
آئی ءَ وتی ترامبالیں پادمُنجار ءِ دیم ءَشھارداتگ اَت اَنت ءُ مُنجارءَ لھتیں ھاک زرتگ اَت آئی ءِ پادان بگر داں کہ گَردنءَ لتاراں اَت ـ برو اللہ تئ پشت ءُ پناہ بات ـ
آمین آمین آئی ءِ ماتءَ دو رَنداں آمین کُت ـ
زیارت کنگءَ پَد آئی ءَ درگاہءِ دَپءَ مِک جَتگ اَت ـ
اے منی چُک نہ کنے ــ اَیے مُریدجان نہ کنے ـ ماتءَ آئی ءِ دَپ داشتگ اَت مُنجار گُڑتگ اَت لُنٹءِ گَٹ پاتکگ اَت اَنت ءُدل ءِ سرءُ چیربوگءَ اَت ـ
درستیں مردم آئی ءَ ھیرانیءَ دلگوش اَت اَنت درگاہ ءِ سرءِ گنوک ءُ نیم ساراں وتی دَپ داشتگ اَت ءُ دوزکاھی یک دومی ءَ نیم چمی چارگ ءُبچکندگءَ اَت اَنت ـ
اِدءَ کس نیست ــــ اِدءَ ھِچ نیست مُنجار ــ
آئی ءِ کوکار آزمانءَ بچیل کنگءَ اَتاں آ سِٹ ءُ دَورجَنگءَ اَت مردماں آئی ءَ را تلام کتگ اَت ءُ مُھر داشتگ اَت ـ
مُنجارءَ را رُوپگے گوں اَت آئی ءَ جَنگ ءُ چم سُھردَیگءَ اَت ـ نہ گُشے چو ــ نہ گُشے چو ــــ!
آئی ءَ ھمے یکیں گپ زَپت کتگ اَت ـ ما درست گنوک ایں اِدءَ کس نیست اِدءَ ھچ نیست ــ مُنجار مارا ءُشمارا رَد دَیگءَ اِنت
