ھَو یار مردکءَ کوٹی آورجتگ ھَوتئی تھت سرءَ وپتگ ــــ ھَو ھَو من وَ نہ زانت کہ چوشیں وبالءُ جانے بیت مئے چَکءَ کپیت- من وَ گُشت بلکیں دو روچی مھمان ئے شپءَ روچ کنت ءُ روت -من چے سھی آں- من زان ئے چوں اوں من شپءَ وپتگاں دَستےءَ وتی تھت داشتگ- ھاھاھاھا….منءَ چےءَ کلام بہ جن؟
من گوں وتی سنگتءَ گوانکوَ گپءَ اَتاں آئی ءَ را نوک آتکگیں مھمان ءِ ھال ءَ دَیگءَ اَتاں-سنگتءَ را دو ماہ ءَ گیش اَت کہ ملکءَ شتگ اَت-
آئی ءِ روگءَ پد یک شپءِ من بازارءَ بوتگ ءُ دیم پہ وتی کوٹی ءَ رھادگ اَتاں کہ راہ ءِ سرءَ من دیست یک نوکیں مردمے گوں دستی بیگ ئےءَ نِشتگ اَت ءُ مُلورمُلور اَت -منءَ کہ دیست ئے چم ءِ رشنا بوتاں منی دیم ءَ پاد آتک دستءُ دروت بوت-
جستءُ پدءَ رند مردکءَ منءَ ھال دات کہ من نوکیں مردمے آں منی نوک بدلی ھمے شھرءَ بوتگ بلے من چہ دورءَ آتکگاں من ادءَ کسءَ نہ زاناں ءُ جاہ نیاراں-
تووڑے بہ کن منءَ یکے دو شپءَ جاگھےءَ ٹاھیں گوں-
من مردک ھیرت چارتءُ جیڑ اِت کہ ثوابی کارے کن آں منی سنگت ملکءَ اِنت آئی ءِ تھت چونھاھالیگ اِنت بلّے بزگ کیت وتی شپءَ روچ کنت پدءَ پہ وتءَ جاگھے درگیجیت ءُ روت-
من مردکے بیگ چست کُت ءُ گُشت بِریں…..منی ھمے گپءَ گوں آئی ءِ گیمرتگیں ھاٹیگءَ چوڑے جَت نرمیں بچکندے ءَ پَدگُشتے تئ ھزارمنّت کہ تواے تھاریں شپءَ منی کُمک کُت-
من ساری ءَ مردک منی رَند ما آتک ءُ کوٹی ءَ سربوتیں من مردک ھال دات کہ اے منی سنگتےءِ تھت اِنت آ بلے انوں ملکءَ چٹی ءَ اِنت تو یکے دو شپءَ ھَمدءَ بوپس دانکہ گیگ بہ بئے ءُ پدءَ پہ وتءَ جاگھے پٹ-
مردکءَ سرسُرینت ءُ گُشت بس شریں بے فکربو….مردکے چمانی تہءَ انگت پہ من منتواریءِ شَھم درپشگءَ اَت-من مردکءَ را کمبلءُ بالشت دات اے وھدی شپءِ یازدہ بج نزیک اَت من وتی تھت سرءَ تچک بوتاں کتابءِ دیم ءَ کُت من انگت تاکدیمے نہ ونتگ اَت کہ مردکءَ پادآتکءُ کوٹی ءِ لائیٹ ءِ بند کُت من گُڑتاں ءُ ھچ نہ گُشت بلکیں بزگ راہ ءَ بوتگ دَمے بُرتگ بِلّے وپسیت من ھم کتاب ایرکُت چم نزکُتاں-
بلے منءَ وااب پیداک نہ اَت چےءَ کہ من مدام شپءَ دیراں نشتگ ءُ ونتگ اولی شپ اَت کہ ماھلہ لائیٹ بنداَت من اے دستءُ آ دستءَ لیٹتاں باریں کدی ءُ چوں وااب کپتاں من یکبرے سُد کُت دانکہ منی کمبلءَ یکے کَشگءَ اِنت اللہ ھیر ..من چماں ءَ پچ کُت دانکہ لائیٹ روک اِنت من گوں ھیرانیءَ زوت زوتءَ دست پہ گوانکوءَ بُرت مردک منی دیم ءَ اوشتاتگ اَت ءُ لُنٹے سُرگءَ اَتاں من واابءِ ھِرسءَ اَتاں من پھمگ ءَ نہ اَتاں چے گُشگءَ اِنت یانکہ چے لوٹگءَ اِنت؟منی چم کہ گوانکوءِ سرءَ وھدءَ کپتاں من جھہ سیرتاں نوکی شپءِ چارءُ نیم بوگی ءَ اَت-
من پادآتک ءُ نشتاں بلے مردک انگت منی کَشءَ اوشتاتگ اَت ءُ منءَ روک روکءَ چارگءَ اَت منی دلءَ بازیں وھم ءُ گماں ئے سرکشگءَ اَت…اللہ ھیر ایشیءَ چے بوت باریں تُن ءَ گپتگ؟دردءُ واکیہ ءُ دگہ بیماری ءَ گپتگ؟پیشاپءَ گپتگ ءُ پسیلءَ نہ زانت؟یانکہ مردک بیماریں ءُ ناکہ منءَ بیمارےپھمگءَ اِنت؟
ھاں؟ من گوں واابیں چم ءُ شنگ ءُ شانگیں ھیالاں جُست کُت-
مھمد تو نمازنہ واں ئے؟
اوووں واااناں-بلے تو بواں-
من وَ پہ تو نہ واناں-
شرپہ من مہ واں پہ وتءَ بواں-
مَیست کُجءَ اِنت؟من مَسیت نہ دیستگ-
من زاناں بزگ کجءَ دیستگ..من دلءِ تہ ءَ اَنچش گُشت-
مَسیت توڈنءَ بوشت بانگ ھمانیمگءَ بیت تو ھمانگوبرو- من پہ بے تھمبلی سوج دات-
چو وَ زانگ نہ بیت..
زانگ بیت ادءَ مسیت بازیں توبانگءِ توارءَ گراں کن برو لازم گارنہ بئے-
ناں تو تیار بو یکجاہ ءَ رواں..من چو تھناگارباں-
ناں تو برو گارنہ بئے -منءَ بِلّ
ناں تو بیاتکیں ئے گھتراَت
یااللہ ئے پاک اے پرشتہ چہ کُجءَ نازل بوت؟ ناں تو برو یاار منءَ بِلّ کہ وپساں دوشی وااب نیاتکگ من پدءَ کمبل تلءَ پترتاں-
مردک کوٹی ءَ چہ درآتک
من وااب ءُ نیم وااب اَتاں کہ مردک آتک کوٹی ءَ گڈک گڈک الماریانی توار برش ئے توار-
من نیم چمی چاراِت کہ مردکوٹی ئے سجھیں ڈکروشنءَ مٹ کنگءَ اِنت -پریجءِ دگہ جاگہ ئے ایرکتگ ٹی وی دگہ جاگھے الماری دگہ جاھے…ءُ کوٹی روپگ جنگءَ اَنت-
من وتءَ را وااب کُت ھچ نہ گُشت بلّے کوٹی ءَ ساپ کنت من ءَ وَ انچوتھمبل کج ایں کہ اِنچوبڑءُ سربہ کناں-
من کمیں رندءَ پادآتکاں شتاں پسیل ءَ پدءَ دیم پہ کوٹی ءَ پُترگءَ اَتاں مردکءَ منءَ توارجت بوشت بوشت…من اَجکہ بوت ءُ اوشتاتاں- ھاں ھیراِنت؟
مھمدچمپلاں کوٹی ءِ دپءَ ایرمہ کن-
منی دپءَ پہ بے انانی درآتک اررررر-
بلے من مردک ھال دات کہ من شپءَ دیراں ننداں کتاب واناں ءُ دو روچ چٹی اِنت من دیراں پادکایاں منءَ پاد مہ کن-
مردکءَ منءَ چار اِت ءُ پدءَ وتی گوانکوءَ دلگوش بوت-
اے روچ گوست من شتاں بازارءَ شپءِ دہ ءَ کہ واتربوتاں کوٹی ئے لائٹ پیسرا مُرتگ اَت مردک وپتگ اَت-
من ھچ نہ گُشت ءُ تچک بوتاں وااب آھگءَ نہ اَت من فیس بک پچ کُت چاراں بوتاں-
مھمد مھمد—-
ھاں-
وتی گوانکولیٹ ءَ بند کن مکسک کایاں اَنت-
اوووں شروااجہ-
من اے دست ءَ آدستءَ لٹ اِتاں وااب پدءَ گار اَت باریں شپءِ کجام پاسءَ منی چم نزبوتاں کہ مردکءَ لائٹ روک کُت-
پادءَ مھمد پادءَ –
اللہ ھیراے کدی روت من دلءَ نرونڈاِت ءُ گُشت-
نوں مردک یل کنگءِ وڑا نہ اِنت- ءُ منی نیمون ھم ھلاسی ءَ رستگ اَنت -مردکءَ را بیست روچءَ گیش اِنت ءُ نئے منءَ وااب ھست ءُ نئے من کتاب ونت کناں-
ءُ انوں یک روچے گپ گپءَ منءَ جُستءِ کُت مھمدتو کدی روئے؟
کجءَ؟
ملکءَ-
برابریں — من دپءَ گُشت برابریں….دلءَ گُشت بگر دوزءَ دوزءَ منءَ گپت –
