نِدارگ ـــ ھوٹلےءَ سئے سنگت نشتگ ءُ گپ ءَ اَنت ـ
اولی سنگت امیر ـ! یار ھمادانش منی سائیکل ءِزرّ پھک جواب کتگ اَنت گُشی زرّ نیست ھَرچی کنے بہ کن ـ
دومی سنگت مُرید ـ اڑے ـــ! کمیں ارمانی بوت ـ اڑے کُت ءُ بسءِ کُت ـ
سیمی سنگت وشدل ـ گڑا؟
امیر :گڑا چے؟ مردک وشیں دلءَ زرّ دَیگءِ وڑا نہ اِنت ءُ مردک پَدءَ بلاھیں شرابی ئے مدام نِشہ اِنت دگانی سرءَ کپتگ ـ ھرکسءَ گوں اَڑءُ کُڈ زاہ ءُ بد ــ اے وَ درست اے مَردکءِ ھمروچیگیں کاراَنت ـ
مرید: ترا سائیکل سرءَ بار اَت چست کت ءُ کئےءَ را دات؟
امیر: بس آ وھداں من نہ زانت کہ چش کنت ءُ سائیکل ھم روت جوابءَ زاہ رَسیت ـ
گپ گپءَ سَئیں سنگتان اِرادگ کُت کہ دانشءَ ھرچ ھالءَ زرّ گِرگی اَنت ـ
گوانکوءِ کن ـ امیرءَ نمبر جَت ـ
ٹوٹ ــ ٹوٹ ــ ٹوٹ ـــ ھاں دانش؟
گپ گپءَ دوئیں برانزگِپتاں بَدءُ رَد دَھمکی ءُ داوا ءَ گپ آتک ـ
نِدارگ ـــ گاڑی ءِ تچان اِنت امیرءُ وشدل سواراَنت دیم پہ دانشءِ لوگءَرھادگ اَنت ـ
توگوانکو کُت ناں؟
ھو …گُشی لوگءَ درآتکگ آں بیائے! توارءِ ھم للّ اَت نِشہ وڑا اَت ـ
یار مُرید ھمراھی مردمے نہ اِنت بس ھُنرکنت ـ
دوئیں سنگت زھرءَ ترکگی اَنت یار یل کنگی نہ اِنت ـ
ناں یارمَردک ھِچ وڑءَ کنگی نہ اِنت مَرگ ھست زند ھست مَردک دَرگیجگی اِنت شَریں مارپاسے گِرگی اِنت ھَڈءُ مَڈءِ پروشگی اَنت نوں گڑا ھَرچ زھمے جَنت بہ جَنت ـ
*
گاڑی روڑءِ سرءَ تیز تچان اِنت دوئیں سنگت گپ کناں اَنت ـ
اڑے بدار اڑے بدار ــ
گاڑی ءِ بریکاں توار کُت ــ
مردمے روڑ سرءَ دیم پہ چیرکپتگ ھون ریچ اِنت ـ
اڑے بزگءَ را یکےءَ ایکسیڈنٹ کتگ ءُ تتکگ یاااار ــ
گڑا بچارے یار باریں ــــ
وشدل تچاں ءَ شُت ــ کپتگیں مردکءِ دست جَت ـ اڑے ساہ ءِ روگ ءُ آھگءَ اِنت ـ
گڑا … ؟
گڑا یار من وت نہ زانیں ـ
اسپتالءَ؟
انا یار ویل ءِ کن مئے سَر ءَدگہ چَٹّی ءُ بلاھے بیت ـ
دوئیں پریشانءُ مُلور دو دِلگوگ اَت اَنت ـ کہ چے بہ کنیں؟
یار مَردک مِریت؟
ھَو یار بلے ماوَھِچ کُت نہ کنیں؟
ما چوں اَڑے ھِچ کُت نہ کنیں مَردک ءَاسپتالءَ وَ بُرت کنیں بلکیں مَرگءَ چہ رَکیت ـ
ھَو ـــ!
نِدارگ ـــ دوئیں سنگت بازیں جیڑگءَ پَد واتربوتاں ـ
ٹَپی ئیں مردکءِ کرا گاڑی داروکائی ءُ مردم مُچھ بواں اَت ـ
اے دوئیں سنگت ھم سَروک دَیگءُ چارگءَ اَت اَنت ـ
ھاں چے بوتگ؟
یار مردمے یکےءَ اکسیڈنٹ کتگ ـ مُچھی ءِ تہءَ یکے ھال دات ـ
گڑا؟
گڑا چے مُرتگ بزگ ـ
اڑے……! دوئیں سنگتان یکپارگی اڑے کُت ـ
نِدارگ *
امیرءُ امیرءِ سنگت وشدلءَ دَگ گِپتگ اَت ءُ دیم پہ لوگءَ رھادگ اَنت ھمے دماںءَ امیرءِگوانکوءَ پیگامے آتک ـ
مرید ــ بژن ءُ ارمان اِنت کہ یار شماپہ سائیکلےءَ مَرد جَت ـ
امیرءُوشدل دوئیں پچگڑتگ اَت اَنت ـ ھلاس
