کاپر ءِ ساھگ سک بزّ اٙت۔ ما مدام شُت کاپر ءِ چیرءٙ نشتاں۔ گرماگ ءٙ پدا گیشر وش اٙت کہ گوات ءٙ لھم لھم ءٙ کش اِت ءُ دلبُرّیں زھیراں تاھیر گِپت۔ ما گیشتر نشت چوک جت ءُ شرت بست۔ بلے بانزی کس ءٙ نہ بُرت۔ ھر وھدے کہ ما کاپر ءِ چیر ءٙ نشت ءُ چوک جت ناکو سوالی ھم نشتگ اٙت۔ بلے ناکو سوالی ھرروچ کاپر ءِ چیر ءٙ چّیلِک رِسگ ءٙ اٙت۔ جورک ءٙ مدام وتی ڈارایانی پچ کنگ ءِ واست ءٙ گوں کوکار ءٙ گوشت بجن چار بجن ھشت۔ ناکو سوالی ءٙ گوشت بچ ءٙ جورک تو گوں وتی کوکاراں مارا کّر کُت ءٙٙ۔ جورک ءِ ھمے بجن چار بجن ھشت ءِ کوکار ناکو سوالی ءٙ ھچ وش نہ بوتگ اٙت۔ ناکو سوالی ءٙ مدام کوھن کوھن اِیں کسّہ آورت گوں وت مارا مُشکول کُت۔ کسّہ سک دراج ءُ شیرکن اتاں دل ءٙ گوشت بس ناکو سوالی ءِ کسّھاں گوش بدار ءُ گیمُرتگیں دل ءٙ تاھیر بکش۔ ناکو سوالی ءٙ وتی ٹالی تپر مدام وتی کش ءٙ اِیر اٙت۔ بلے مارا کس ءٙ وتی ٹالی تپر ءِ دست جنٙگ ءٙ نہ اِشتے۔ گڑا ما جُست کُت ناکو تئی تپر ءِ راز زاناں چے اِنت کہ تو مارا دست جنٙگ ءٙ نئے لے ؟ گوشت ئے شُما وتی چوک ءِ کار ءٙ بکن ئے تپر ءٙ بِلّے۔
ما گڑا گوشت شر ناکو تو مدام چِیلک ریس ءِ اینچو چیلکاں چے کن ئے ؟
گڑا ناکو سوالی ءٙ پٙسّہ دات منی چُکاّں من جوپاگ ءِ تیاری ءٙ کنگ ءٙ اوں۔ من ءٙ ڈگارے ھست کشار اِنت رون بیت پدا ھوشگ بندگ لوٹاں۔ گوشت ئے شُما مدام تپر تپر کن ئے تپر ءٙ بِلّے بیائے شمارا چِیلِک ریسگ ءِ ھیل دیاں۔
چیزے وھد گوستگ اٙت ما کاپرے چیر ءٙ چوک نہ جتگ اٙت۔ چیا کہ جورک جان ءٙ وش وش نہ بوتگ اٙت۔ من پدا سیاد ءُ وارثانی گندوک ءٙ شُتگ اِتگ اتاں۔ یک روچے من وتی ھما ھمبلان ءٙ گوشت ما شُما دیر اِنت چوک نہ جت ءٙ بیا رواں کاپر ءِ چیر ءٙ چوک جناں۔ تاں ھمبلاں ھچ گیگ نہ دیست۔ من ھیران بوتاں کہ ھمبلان ءٙ چے بوتگ اٙئیگ واست ءٙ تیار نیاں۔ گڑا من جُست کُت اٙنت شُمئے جیڑہ زان ءٙ چے اِنت ؟ گڑا پسّہ دات اِش کہ کاپر ءِ چیر نوں نندگی نہ اِنت۔ کاپر چوٹ اِنت کپکی اِنت۔ من گوشت اے چوں ؟
من گوشت شُما را گڑا دست چیا سر ءٙ اٙنت اوشتاتگ ئے سنگ ءُ سیاہ اِت شُما دار چیر جتیں بلے چہ کپگ ءٙ رکّ اِت۔ گڑا گوشت اِش کاپر ءٙ گوبز پِر رتکگاں نوں کاپر سر ءٙ زردُکی ءُ سیاھکی گوبز سک باز اِنت۔ مِنگ چیر جنٙگ ءٙ نیلاں گوبز مردم ءٙ تج جناں۔ پدا اے سیاھُکی گودِر ءِ تِج مردم ءٙ سک تورینیت۔
بٙلے من ءٙ انگت ایشانی گپ دلجمی ءٙ باور نہ بوتاں من دیم پہ کاپر ءٙ شُت اوں۔ من وھدے سر بوت اوں تاں دیست کاپر پھک چوٹ اِنت کپگی اِنت۔ لھتیں مردم کاپر ءٙ مِنٙگ چیر جنگ ءٙ اٙت اٙنت ءُ لھتیں مردم ھمے مِنگ جنوکاں چہ پُشت ءٙ کشگ ءٙ اتاں۔ ایشاں الکاپی ءٙ مِنگ جنگ ءٙ نیلگ ءٙ اِت اٙنت کہ کاپر بلے کپ ایت۔
منی پُشت ءٙ سنگت بزاں گون اٙنت گوں من ءٙ گوشت ءِ شر بچار باریں ترا نوں مئے گپ باور بوتاں ؟
من گوشت ھو بٙلے اے وڈ چوں ؟
گوشت اِش بچار دھکاناں دنیا ءُ جھان ءِ ھُرماگ کاپر ءِ سر ءٙ تاپ ءٙ داتگاں اینچو ھُرماگ ءِ بار ءٙ کاپر چون سگّ اِت کنت۔ ھما کہ کاپر ءٙ مِنٙگ چیر جنگ ءٙ اتاں دھکان آنی سر ءٙ سک ھِژم گِپتگ اتاں۔ گوشگ ءٙ اتاں کاپر دھکانانی سوب ءٙ چے کپگی اِنت۔ ایشی زمہ وار پھک ءٙ دھکان اٙنت۔ من گڑا جُست کُت آں اے چونیناں چہ پُشت ءٙ شُمارا کشگ ءٙ اٙنت مِنگ جنگ نیلگ ءٙ اٙنت ؟
گوشت ءِ اِش اے ھما یاں کہ دھکاناں ایشانی مچّ بُرّ اِتگ آں ھُرماگ کاپر ءِ سر ءٙ تاپ ءٙ داتگاں۔ اے لوٹاں کاپر بہ کپ ایت۔
جورک ءٙ چہ پُشت ءٙ گوں زوریں توار ءٙ گوشت نوں باریں بجن چار بجن ھشت۔
